Հայաստանի բռնցքամարտի ազգային հավաքականը
երկու օր անցկացրեց Հայաստանի հարավային շրջաններում եւ Արցախում
Ճանաչողական այցի նախաձեռնողը բռնցքամարտի ֆեդերացիայի նախագահ, ԱԺ պատգամավոր Արթուր Գեւորգյանն էր, որը շրջայցի ընթացքում «Առավոտին» ասաց. «Այսօրվա մեր հավաքականի տղաների մեծ մասը կամ Անկախ Հայաստանի տարեկիցն է, կամ Արցախյան ազատամարտի ժամանակ տակավին մանուկ էր: Նրանք Արցախյան հերոսամարտին տեղյակ են գլխավորապես բանավոր պատմություններից: Նպատակս այն էր, որպեսզի տղաները սեփական աչքերով տեսնեն Արցախ աշխարհը եւ հասկանան, թե ինչի համար եւ ինչ պայմաններում է կռվել ու հաղթել հայ զինվորը, որն այն ժամանակ իրենց հասակակիցն է եղել: Ուզում եմ, որպեսզի մեր բռնցքամարտիկների մեջ նույնպես գերիշխի հաղթողի հոգեբանությունը, որպեսզի նրանք էլ իրենց «պատերազմի դաշտում»՝ ռինգում ավելի վստահ զգան: Ճիշտ է, վերջին ամիսներին հայկական բռնցքամարտը որոշակի ծանրակշիռ հաջողություններ է արձանագրել, բայց ամենակարեւոր մեկնարկները դեռ առջեւում են»:
Բռնցքամարտիկները եղան Շուշիում, այցելեցին Արցախյան պատերազմում «Սասունցի Դավիթ» ջոկատի զոհված հրամանատար Սամվել Գեւորգյանի եւ նրա մարտական ընկերների հուշաքարին, որտեղից էլ բարձրացան Գանձասար:
Արդեն տունդարձի ճանապարհին հավաքականի անդամ, 69 կգ քաշային Վլադ Մարգարյանը կիսվեց իր եւ թիմակիցների տպավորություններով: «Մենք առաջին անգամ եղանք Արցախում: Հավաքականի բոլոր տղաներն էլ անչափ տպավորված են: Արցախը դրախտային երկիր է ու հիմա ենք հասկանում, որ հայկական այս տարածքի համար արժեր կռվել ու հաղթել: Մտովի պատկերացնում եմ այն տարիների հայ ազատամարտիկին, որն այն տարիներին իմ ու թիմակիցներիս հասակակիցն է եղել ու հաղթել է: Այն էլ՝ իրական պատերազմում: Այսօր մենք նրանց շնորհիվ ապրում ենք խաղաղ պայմաններում: Հարաբերական խաղաղ պայմաններում: Բայց մենք էլ մեր «պատերազմի դաշտն» ունենք՝ ռինգը: Ու մենք էլ պետք է մեր հաղթանակները տանենք: Շնորհակալ ենք մեր ֆեդերացիայի նախագահ Արթուր Գեւորգյանին՝ այս ուսուցողական ուղեւորությունը կազմակերպելու համար»:
ԱՇՈՏ ՀԱԿՈԲՅԱՆ
Կարդացեք նաև
«Առավոտ» օրաթերթ
05.07.2014
