«Դեմ եմ» նախաձեռնության անդամները վարչապետ Հովիկ Աբրահամյանի հանձնարարականի հետքերով այս պահին հավաքվել են ֆինանսների նախարարության դիմաց: Հիշեցնենք, որ համատեղության կարգով բուհերում աշխատող ու սոցիալական վճարներից չազատված երիտասարդ դասախոսների հարցը լուծելու համար վարչապետը հանձնարարել էր օրենսդրական նախագիծ մշակել:
«Այդ հանձնարարականը վարչապետը տվել ֆինանսների նախարարությանը, բայց մինչ օրս չենք տեսել՝ ինչ քայլեր են ձեռնարկվել խնդրի լուծման համար: Այն, որ կենսաթոշակայինի հարցով հասարակությանը շահավետ գործողություններ չեն արվում՝ արդեն նորություն չէ, իրականություն է դառնում, որ ենթակաները պետական համակարգում իրենց ղեկավարներին չեն ենթարկվում: Կոնկրետ նախարարությունը հարկ չի համարել ենթարկվել վարչապետի հանձնարարականին»,- այսօր բողոքի ակցիայից առաջ ասաց նախաձեռնության անդամ Դավիթ Մանուկյանը:
Նրա խոսքով, ավանդույթ է դարձել, որ քաղաքացիներն են ստիպում սահմանադրական կարգը հարգել. «Հիմա էլ պետք է ստիպենք, որ նախարարը ենթարկվի վարչապետին»:
Կարդացեք նաև
Նրա տպավորությամբ այնքան թքած ունեն գիտնականների վրա, որ ձգձգում են խնդրի լուծումը, որ դեռ դիմում չգրած դասախոսներն էլ դիմում գրեն, ազատվեն աշխատանքից կամ էլ արդեն կիսամյակի վերջ է ու ինքնըստինքյան կավարտվի խնդիրը՝ առանց լուծման:
Այս պահին նախաձեռնության անդամները իրենց պահանջ-նամակն են պատրաստվում հանձնել նախարարին:
Արփինե ՍԻՄՈՆՅԱՆ
