Արդարադատության նախարարության «Վարդաշեն» քրեակատարողական հիմնարկի կալանավոր Հայկ Վարդանյանից հետո սա այս տարվա երկրորդ դեպքն է: Համաներում չի կիրառվում նաեւ «Նուբարաշեն» քրեակատարողական հիմնարկի կալանավոր Սամվել Վարդանյանի նկատմամբ:
Սամվել Վարդանյանի պաշտպանն է ՀՀ փաստաբանների պալատի անդամ Արտավազդ Փարսադանյանը:
Aravot.am-ի տեղեկություններով, Սամվել Վարդանյանը դատապարտվել է ազատազրկման 2003 թ. փետրվարի 22-ից:
Նա կատարել է միջին ծանրության հանցագործություն, մեղադրվել է խարդախության համար:
Կարդացեք նաև
Դատարանը դատավճռից հանել էր կալանավորի «նստած» ժամանակահատվածը, եւ փաստորեն, կալանավորն իր պատիժը պետք է կրեր 7 տարի 10 ամիս: Նրա նկատմամբ համաներում կիրառվելու դեպքում, պատժաչափից երկու տարի եւս կկրճատվեր:
Արդարադատության նախարարության «Նուբարաշեն» քրեակատարողական հիմնարկի վարչակազմը տեղյակ է այս խնդրից, սակայն կալանավորի նկատմամբ չի կիրառվում համաներումն այն պատճառաբանությամբ, թե «Արմավիր» քրեակատարողական հիմնարկ նա պետք է տեղափոխվի, եւ հենց «Արմավիրի» վարչակազմն էլ կկիրառի համաներումը:
Սակայն, որքան հայտնի է, «Արմավիրը» դեռ ամբողջությամբ շահագործման չի հանձնվել, եւ պարզ չէ, թե կալանավորը երբ կտեղափոխվի այնտեղ:
Այս նույն տրամաբանությամբ, կալանավորին առաջին հերթի բուժօգնություն կարող են ցույց չտալ անհրաժեշտության դեպքում, պատճառաբանելով, թե «Արմավիր» քրեակատարողական հիմնարկ տեղափոխվելուց հետո կանեն այդ:
Կալանավորի պաշտպանը մտադիր է դիմել դատարան. նա արդեն փորձ ունի, առաջին երկու ատյաններում նախորդ կալանավորի՝ Հայկի գործով հաղթել է:
Ռուզան ՄԻՆԱՍՅԱՆ