«Այս քննարկումը ուշացած է»,-ՀՀ ԱԺ-ում արտահերթ նստաշրջանի ժամանակ, երբ քննարկվում էր ՀՅԴ-ՀՀԿ համատեղ հայտարարությունը՝ Արամ Մանուկյանի և ազատամարտիկների նկատմամբ կատարվածի վերաբերյալ, ասաց ՀԱԿ խմբակցության պատգամավոր Գագիկ Ջհանգիրյանը:
Գագիկ Ջհանգիրյանը հայտարարեց, թե ՀՀ ԱԺ-ն թերացել է և «այս քննարկումը ոչ թե պետք է եզրափակեր բռնարարքների շարքը, այլ մեկ-երկուսից հետո անհապաղ պիտի դա տեղի ունենար»:
Պարոն Ջհանգիրյանը դատապարտեց ազատամարտիկների նկատմամբ տեղի ունեցածը և զարմանք հայտնեց, թե ինչո՞ւ ՀՀ ՊՆ-ն չի արձագանքում. «Ես զարմանում եմ, որ ՊՆ-ն չի արձագանքում: Բանակի գնդապետը հիմա նստած մտածում է, որ վաղը, եթե ինքը զորացրվի, կարող է փողոցում գցեն ոտքի տակ ու շանսատակ անեն»:
Նա Ռազմիկ Պետրոսյանի և մյուսների նկատմամբ կատարվածը համարեց խայտառակություն ու նշեց. «Չէ՞ որ Ռազմիկ Պետրոսյանը ոչ միայն կամավորական է եղել, այլև հետո գործող բանակ է անցել, գնդի և սահմանային գնդի հրամանատար եղել, երեք եղբայրով ծառայել են բանակում»:
Կարդացեք նաև
Արամ Մանուկյանի խնդրի մասին ասաց. «Դեպքից րոպեներ անց ոստիկանության աշխատակիցների ներկայությամբ դիտել եմ այդ տեսաերիզը: Հանցագործը մուտք է գործում պատշգամբ, ընդամենը երեսուն վայրկյան հետո Արամ Մանուկյանն է մուտք գործում: Այդ մարդու համար արտաքին դիտարկում են արել, հանցագործը մենակ չի գործել: Ինքը առնվազն բռնցքամարտիկ է, քանի որ բռնցքամարտիկի կեցվածք է ընդունում և ձախ ձեռքով խփում: Արդյոք նրան չէ՞ր կարելի գոնե երկու ամիս կալանքի տակ պահել»:
Տաթև ՀԱՐՈՒԹՅՈՒՆՅԱՆ
