Երկու օր է՝ ԶԼՄ-ներն ու սոցցանցերը, իրար հերթ չտալով, ախուվիշ են անում «ազգի վիճակի», մակարդակի, «մեղքության» վրա՝ «ողբամ զքեզ» տոնով: Պատճառը այս անգամ ոչ թե այսինչ օլիգարխի բաժանած մատաղն է կամ այնինչ օլիգարխի փողերով կազմակերպված ձրի համտեսը, այլ՝ «Երեւան մոլում» հայտարարված ակցիան, որի ընթացքում մարդիկ հնարավորություն ունեին 1000 դրամով էլեկտրական ինչ-ինչ սարքեր գնել:
Բնականաբար, անհավանական ցածր գնով որեւէ բան ձեռք բերելը ոգեւորել էր մարդկանց, եւ դա, վստահեցնում եմ, ազգության հետ որեւէ կապ չունի: Անգամ չափազանց մեծ հերթերի արդյունքում առաջացած հրմշտոցն ու բրդբրդոցը ազգություն չի ճանաչում:
Մի քանի տարի առաջ նմանատիպ տեսարանի էի ականատես եղել (հոդվածն ու լուսանկարները՝ այստեղ) միանգամայն բարեկեցիկ Լոնդոնում: Մի ամբողջ օր մարդիկ իրար ոտնատակ էին տալիս, ոստիկաններին հրելով առաջ էին գնում, առավոտյան ժամը 6-ից խանութների մոտ հերթ էին պահում… Boxing day էր ՝ մեծ զեղչերի օր՝ Սուրբ Ծննդյան տոնին հաջորդող օրը՝ դեկտեմբերի 26-ին, եւ այդ օրը եւ տրանսպորտում խցկվելու համար էին իրար քաշքշում, եւ խանութ առաջինը մտնելու համար էին հրմշտում, եւ օրվա վերջին փողոցը զավթել էին եւ հսկա աղբանոց սարքել…
Նմանատիպ բաներ կատարվում են ԱՄՆ-ում՝ «Սեւ ուրբաթ»-ին, եվրոպական այլ երկրներում էլ՝ մեծ զեղչերի ժամանակ:
Կարդացեք նաև
Մարդիկ ամեն տեղ էլ նույնն են, երբ առիթ եւ հնարավորություն ունեն՝ անկարգություն անելու, միշտ գտնվում են այդ առիթից օգտվելու ցանկություն ունեցողները: Այնպես որ՝ բավական է միացնեք «ողբամ զքեզ, ազգ իմ դշխեմ» մուղամը…
Մելանյա ԲԱՐՍԵՂՅԱՆ
ուրեմն ինչ լաւ, տեսնում ե՞ք, չպիտի յուսահատվիլ՝ մեր Հայաստանն ել արդեն սկսում է նմանիլ «նորմալ» երկիրների, սրընթաց հասնում է եւրոպական/ամերիկյան բա՜րձր քաղաքակրթությանց մակարդակների…
Հայեր ջան,լրիվ արխային,ավելի վատնել է լինում,տեսեք…
https://www.youtube.com/watch?v=-LFLoV9N9MQ
https://www.youtube.com/watch?v=UIk4OBf_Y7s
https://www.youtube.com/watch?v=rCb_PN9_AII
Բայց լրատվամիջոցներդ սիրում եք իրար վրա բոչկա գլորել: Հեղինակի նշած արձագանքը եղել է սոցցանցերում: Լրատվամիջոցները միայն արձանագրել են: