«Ոչ թալանին» նախաձեռնության արդեն չորրորդ օրը շարունակվող էլեկտրաէներգիայի սակագնի բարձրացման դեմ բողոքի նստացույցին ինչպես երեկ, այնպես էլ այսօր լայնորեն անդրադառնում են միջազգային հեղինակավոր լրատվամիջոցները:
«The Washington Post»-ը «Հազարավոր մարդիկ Հայաստանում բողոքում են էլեկտրաէներգիայի սակագնի բարձրացման դեմ» վերնագրով նյութում ներկայացրել է վերջին իրադարձությունների ամփոփագիրը եւ կարծիք հայտնել, որ «Էլեկտրաէներգիայի սակագնի բարձրացման դեմ ցույցերն ավելի քիչ համակարգված են, քան նախագահական ընտրություններից հետո տեղի ունեցածները, բայց դեռ կարող են լայն արձագանք ստանալ ներկայիս քաղաքական մթնոլորտում»:
«Հայաստանի «էլեկտրական Երեւանի» ցուցարարները վերադառնում են փողոց՝ չնայած ձերբակալություններին եւ ջրային հարվածներին» վերնագրի ներքո ամերիկյան հեղինավոր «The New York Times»-ը ներկայացրել է ցույցի մասնակիցների, լրագրողների եւ շարքային օգտատերերի Թվիթերյան գրառումները, լուսանկարները եւ տեսանյութերը վերջին օրերի իրադարձությունների մասին:
«BBC»-ն նույնպես անդրադարձել է իրադարձություններին: «Հայաստանի բողոքի ցույցեր. Հազարավոր մարդիկ պայքարում են էներգիայի գների թանկացման դեմ» վերնագրով նյութում հեռուստաընկերությունները ներկայացրել է բողոքի ցույցերի ընթացքը եւ տեղի ունեցած բռնությունները:
Կարդացեք նաև
«The Wall Street Journal»-ն առանձնացրել է այն փաստը, որ ցույցերի ընթացքում երեւում են Եվրամիության դրոշներ եւ փորձել է ներկայիս վիճակը կապել Եվրասիական տնտեսական միության Հայաստանի անդամակցության հետ: Հեղինակը նաեւ կարճ ներկայացրել է Ուկրաինայում 2013-2015 թվականներին տեղի ունեցած բողոքի ցույցերը եւ դրանք կրկին կապել ԵՏՄ-ի հետ:
Այժմ Հայաստանում գտնվող ռուսական «RT» հեռուստաընկերության թղթակիցները հաղորդել են, որ ցուցարարները չեն ցանկանում հանդիպել Հայաստանի նախագահ Սերժ Սարգսյանի հետ եւ շարունակում են նստացույցը:
Պատրաստեց Աշոտ ԻՍՐԱԵԼՅԱՆԸ
