ՀՀ նախագահ Սերժ Սարգսյանի հայտարարությունը, որ ՀԷՑ-ում հնարավոր է աուդիտ անցկացվի եւ այն լուրերը, որ աուդիտի ընթացքում Հանրային ծառայությունները կարգավորող հանձնաժողովի որոշումը պետք է կասեցվի՝ Aravot.am-ի հետ զրույցում պարզաբանեցԱԺ պատգամավոր Թեւան Պողոսյանը:
Պարոն Պողոսյանն ասաց, թե աուդիտ անցկացնելը դեռ չի նշանակում, որ ավտոմատ կասեցվում է սակագնի բարձրացման որոշումը: Պարոն Պողոսյանի ներկայացմամբ՝ հնարավոր է աուդիտը ամիսներ տեւի, իսկ օգոստոսի 1-ից ուժի մեջ մտնի սակագնի բարձրացման մասին որոշումը:
Իսկ որպեսզի հոսանքի գնի բարձրացման որոշումը կասեցվի, հարկավոր է հատուկ որոշում, որ, ասենք, պետք է սառեցվի հանձնաժողովի որոշումը մինչեւ ավարտվի աուդիտը:
Պարոն Պողոսյանը նշեց, որ աուդիտը պետք է անցկացնեն միջազգային ընկերությունները: Ընդ որում՝ այն պետք է ունենա մի քանի ուղղություն: Պատգամավորի խոսքերով՝ նախ պետք է ՀԷՑ-ի ֆինանսական կողմը ենթարկվի աուդիտի, պարզվի՝ ատկատներ, կոռուպցիա եւ ինչ են չարաշահումներ են եղել:
Կարդացեք նաև
Բացի այդ՝ աուդիտ պետք է լինի նաեւ ամբողջ համակարգում, ՀԷՑ-ի գործընկեր ընկերություններում եւ, ի վերջո, պետք է դիագնոզ տրվի ՀԷՑ-ի աշխատանքին, ըստ այդմ էլ, այսպես ասած, բուժման մեխանիզմներ առաջարկվեն:
Ըստ պարոն Պողոսյանի՝ այս աուդիտով էլ պետք է բացահայտվի, թե արդյոք գողություն եղե՞լ է եւ այդ գողացած գումարը նորից վերադարձվի համակարգին՝ առողջացման համար:
Պատգամավորը նշեց նաեւ, որ ՀԷՑ-ում վատ կառավարման ուղղությամբ եւս պետք է աուդիտ լինի, փորձագետները ծրագիր, առաջարկություն ներկայացնեն կառավարման բարելավման համար, այսինքն` մշակեն գործողություններ:
Ի վերջո, ըստ պատգամավորի, պետք է պարզվի, այդ ինչպես եղավ, որ շահույթով աշխատող ընկերությունը 250 միլիոնի պարտք կուտակեց:
Նելլի ԲԱԲԱՅԱՆ
