Թեեւ շատերը ռուսական կազմակերպությունները եւ նրանց «դուստրերին» համարում են Ռուսաստանի քաղաքականության ուղիղ դիրիժորներ, իրականում այս կազմակերպությունների գործունեությունը կապված չէ պետության հետաքրքրությունների հետ: Այս մասին, անդրադառնալով էլեկտրաէներգիայի սակագնի բարձրացման դեմ այս օրերին Երեւանում տեղի ունեցող ցույցերին, գրել է «Kapital-rus»-ը:
Ըստ կայքի՝ մի շարք փորձագետներ չեն բացառում, որ Երեւանի ցույցերը կարող են օգտագործվել Հայաստանի իշխանությունների կողմից ՀԷՑ-ի վրա ճնշումներ գործադրել, որպեսզի «Ինտեռ ՌԱՕ»-ին հեռացնեն երկրի էներգետիկ շուկայից: Բաշխիչ ցանցերի սեփականատիրոջ փոփոխման մասին խոսվում է արդեն մի քանի ամիս: Վերջին տեղեկություններով՝ ՀԷՑ-ը ձեռք բերելու մեջ հետաքրքրված են ամերիկական եւ եվրոպական ընկերությունները:
«Kapital-rus»-ի կարծիքով՝ տարածելով այն միտքը, որ սակագների բարձրացման մեջ մեղավոր է Ռուսաստանը, Հայաստանի ԶԼՄ-ները շրջանցում են Որոտանի կասկադի վաճառքը ամերիկյան կազմակերպությանը, ինչը պատճառ կդառնա սակագների 2 կամ 3 անգամ թանկացմանը: Այս գործարքը Հայաստանի հետաքրքրություններից դուրս է, սակայն երկրի իշխանություններին փող է պետք:
Ադրբեջանցի քաղաքագետ Իլգար Վելիզադեն կարծում է, որ «Հայաստանի այսօրվա դժվարությունների մեղավորները այդ երկրի իշխանություններն են: Հայաստանի բոլոր խնդիրները պաշտոնական Երեւանի ոչ համարժեք քաղաքականության արդյունք են: Այդ երկրի տնտեսական համակարգը չի ինքնավերարտադրվում, այլ գոյատեւում է միայն գրանտների միջոցով, արտաքին վարկերով եւ սփյուռքի տրանսֆերտներով»:
Կարդացեք նաև
Տնտեսական գիտությունների դոկտոր Վալենտին Կատասոնովն էլ կարծում է, որ սակագների խնդիրները կարող են լուծվել էներգետիկ ընկերության ազգայնացմամբ: «Էներգետիկան, ինչպես նաեւ այլ ենթակառուցվածքներ, մեծ շահութաբերություն չունեն եւ, ըստ էության, գտնվում են պետական հատվածում եւ հենց պետությունն է պատասխանատու նրա զարգացման համար: Այդ պատճառով նման կառույցների սեփականաշնորհումը անհատների կողմից սխալ է»:
Պատրաստեց Աշոտ ԻՍՐԱԵԼՅԱՆԸ
