«Ես ի սկզբանե եղել եմ պառլամենտական համակարգի կողմնակից և այն կարճ ժամանակում, որ եղել եմ քաղաքական դաշտում, ներկայացրել եմ կառավարման համակարգի փոփոխման նախագիծ, բայց ԱԺ-ն դա մերժեց»,- այսօր լրագրողների հետ հանդիպման ժամանակ հայտարարեց Սահմանադրական բարեփոխումների մասնագիտական հանձնաժողովի անդամ Վարդան Պողոսյանը`արձագանքելով այն հարցին, թե տասը տարի առաջ էլ նա հայտարարում էր, որ փոփոխվող Սահմանադրությունը լավագույնն է, նույնն անում է այսօր:
«Այն ամենը, ինչ ներկայացված է ձեր դատին, արտացոլում է այն, ինչ համապատասխանում է իմ`սահմանադրագետի համոզմունքներին», -ընդգծեց նա`հավելելով, որ սա բնավ էլ վերջնական փաստաթուղթ չէ, դոգմա չէ, այն ենթակա է քննարկումների, փոփոխությունների:
Հանձնաժողովի մյուս անդամ Հրայր Թովմասյանն էլ, որը նույնպես նախորդ Սահմանադրության հայրերից է, ասաց, որ որպես մարդ, որպես մասնագետ հպարտ է, որ մասնակցել է այս փաստաթղթի ձեւավորման աշխատանքներին`անկախ նրա հետագա ճակատագրից:
«2005.թ-ի սահմանադրական փոփոխությունների հիմնական թերություններն արդեն այն ժամանակ պարզ էին, նշված էին. ցավոք, դրանք չընդունվեցին»,- հիշեցրեց Վարդան Պողոսյանը:
Կարդացեք նաև
Պատասխանելով էլ ներկայացված փաստաթղթի շուրջ քաղաքական կոնսոլիդացիայի հարցին, ինչի մասին անընդհատ խոսում է նախագահ Սերժ Սարգսյանը, Վարդան Պողոսյանն ասաց, որ դա քաղաքական խնդիր է, ինչը մասնագիտական հանձնաժողովին չի առնչվում:
Նելլի ԳՐԻԳՈՐՅԱՆ
