«Չե՛ք անցկացնի» նախաձեռնության նախաձեռնող խմբի անդամ Արշակ Մուսախանյանը վստահեցնում է՝ նախաձեռնությանը միանալու ցանկություն հայտնած ուժերի ու նախաձեռնությունների առջեւ սահմանափակումներ դրված չեն եղել:
Հիշեցնենք, որ «Ազգային Անվտանգություն» կուսակցության նախագահ Գառնիկ Իսագուլյանը 1in.am-ի հետ զրույցում քննադատել է սեպտեմբերի 12-ին ձեւավորված «ՈՉ»-ի ճակատի մոտեցումները՝ պնդելով, թե ճակատում ուժերն ընդգրկվում են խտրական մոտեցումով: Գառնիկ Իսագուլյանը չի հերքել, որ իրեն «Ոչ»-ի ճակատ չեն ներգրավում Ռոբերտ Քոչարյանի հետ կապ ունենալու համար:
Aravot.am-ը Արշակ Մուսախանյանից հետաքրքրվեց՝ իսկապե՞ս Գառնիկ Իսագուլյանի՝ նախաձեռնությանը միանալու պատրաստակամությունը մերժել են:
Կարդացեք նաև
«Եթե Գառնիկ Իսագուլյանը դեմ է Սահմանադրական փոփոխություններին, նա կարող է հայտարարել, որ դեմ է, ի՞նչ խնդիր կա»,- ասաց Արշակ Մուսախանյանը:
Մեր հարցին, իսկ «Ոչ»-ի ճակատում նրա ներգրավելու առումով խնդիր կա՞, մեր զրուցակիցը շարունակեց. «Ոչ-ի ճակատը դաշինք չէ, պարզապես միասնական հայտարարություն է եղել: Եթե Գառնիկ Իսագուլյանը դեմ է, ինքը հայտարարում է՝ դեմ է ու, ըստ էության, կարելի է ասել, որ նույն ճակատի մեջ է մտնում, ինչպես մյուս մասնակիցները, որոնք հայտարարել են: Այս պահին ՀԺԿ գրասենյակում միասին հայտարարել ենք, որ բոլորս ոչ ենք ասում սահմանադրական փոփոխություններին, հիմա Գառնիկ Իսագուլյանը թող հայտարարի, որ դեմ է»:
Անդրադառնալով Գառնիկ Իսագուլյանի հայտարարությանը, թե Ռոբերտ Քոչարյանի հետ կապերի համար իրեն չեն ներգրավում «Ոչ-ի» ճակատում՝ Արշակ Մուսախանյանը զարմացավ. «Ո՞վ է ասել, ես՝ որպես նախաձեռնող խմբի անդամ, տեղյակ չեմ եղել, որ Գառնիկ Իսագուլյանը մեզ դիմել է նման հարցով: Ո՞ւմ է դիմել, ո՞վ է նրան մերժել կամ նման բաներ ասել»:
Հիշեցնենք, որ օրեր առաջ Սահմանադրական փոփոխություններին ոչ ասող ուժերի համաժողովի ժամանակ Հայ ազգային կոնգրեսը, «Ժառանգությունը», «Հիմնադիր խորհրդարանը», Հայաստանի ժողովրդական կուսակցությունը և մի շարք քաղաքացիական նախաձեռնություններ ու հասարակական կազմակերպություններ ստորագրել են համատեղ հայտարարություն:
Արփինե ՍԻՄՈՆՅԱՆ
