Դեկտեմբերի 2-ին և 3-ին առաջին անգամ Հայաստանում «Նարեկացի» արվեստի միությունը հյուրընկալելու է «Salento» միջազգային կինոփառատոնը, որը շրջագայում է տարբեր երկրներում՝ ցուցադրելով անկախ ֆիլմեր: «Փառատոնը Երեւան եկավ գործընկերներիցս մեկի՝ Լիանայի շնորհիվ, ով Իտալիայում աշխատել է ինձ հետ: Անընդհատ քաղաքներով էինք շրջագայում եւ 9 տարի անց վերջապես հերթը հասավ Երեւանին»,-լրագրողների հետ զրույցում ասաց «Salento» կինոփառատոնի տնօրեն Լուիջի Կամպանիլեն:
«Նարեկացի» արվեստի միությունում կինոյի և թատրոնի դերասան Աշոտ Ադամյանին կինոարվեստում ունեցած նշանակալի ավանդի համար շնորհվեց «Salento» միջազգային կինոփառատոնի դերասանական մրցանակը, որը հանձնեց Հայաստանում Իտալիայի արտակարգ եւ լիազոր դեսպանը: «Յուրաքանչյուր քաղաքում, որտեղ հյուրընկալվում ենք, նշանակալի գործիչներից մեկին մրցանակ ենք շնորհում: Հաշվի առնելով Ադամյանի ստեղծագործական գործունեությունը՝ որոշեցինք մրցանակը նրան շնորհել: Անկեղծ ասած՝ հայկական կինոյի մասին շատ բան չգիտեմ, բայց տեղյակ եմ, որ երիտասարդներն ակտիվ են: Նախատեսում ենք հաջորդ տարի փառատոնում երիտասարդ հայ ռեժիսորների ֆիլմեր ներկայացնել»,-ասաց Լուիջի Կամպանիլեն:
«Շատ հաճելի անակնկալ է: Բանից պարզվում է՝ արածդ աշխատանքը դարակում չի մնում եւ արձագանք է գտնում այլ երկրներում: Շնորհակալ եմ այն մարդկանց, ովքեր գնահատում են իմ համեստ աշխատանքը»,-լրագրողների հետ զրույցում ասաց Աշոտ Ադամյանը: Aravot.am-ը դերասանից հետաքրքրվեց՝ արդյո՞ք նույն գնահատանքը զգալի է նաեւ Հայաստանում: «Գնահատանքը մարդկանց միջոցով եմ զգում, այլ կերպ՝ ոչ: Կարծում եմ՝ դա ամենակարեւոր բանն է, որովհետեւ ամենաթանկ գնահատականն, այնուամենայնիվ, մարդիկ են տալիս»,-ասաց նա: Ադամյանը տեղեկացրեց, որ տարբեր երկրներից գործակցության առաջարկներ կան, մասնավորապես՝ Ավստրիայից, Գերմանիայից, Կանադայից. «Պատվիրատուն դրսից է: Ստացվում է, որ ֆիլմը հայկական չի: Այս պահին շարունակում են նաեւ ռեժիսուրա սովորել: Սցենարներ եմ գրում, դրսեւորվում նաեւ երաժշտական եւ գրական ասպարեզներում: Այդ գործերը հրատարակվելու եւ բեմադրելու կարիք ունեն»:
Կարդացեք նաև
Անվանի դերասանի խոսքով՝ քանի դեռ կինոն շփոթում ենք սերիալների հետ, կինեմատոգրաֆիան արդյունքի չի հասնի. «Ինձ էկրաններից չեք տեսնի, որովհետեւ այն, ինչ տեսնում եք, հիմնականում սերիալներ են եւ փոխառված արտասահմանյան ֆիլմեր: Կինոարտադրությունը ոտքի տակ ընկնել չի սիրում: Ցավում եմ, որ հանդիսատեսի զգալի մասը պարզապես տեղյակ չէ՝ ինչ ֆիլմերի մասին ենք խոսում»:
Հավելենք, որ այս օրերին «Նարեկացի» արվեստի միությունում կցուցադրվեն կինոփառատոնի 5 գեղարվեստական, 3 կարճամետրաժ և մեկ վավերագրական ֆիլմեր, այդ թվում՝ հանրահայտ դերասանուհի Սոֆի Լորենի մասնակցությամբ վերջին ֆիլմը՝ «Մարդկային ձայն» դրամման:
Մանրամասները` տեսանյութում:
Լուիզա ՍՈՒՔԻԱՍՅԱՆ
