«Ուսումնասիրությունները ցույց են տալիս, որ աշխարհի բոլոր երկրներում հետտոնական սթրեսներ գրանցվում են: Սթրեսը փոփոխվող իրավիճակի նկատմամբ օրգանիզմի ռեակցիան է: Ցանկացած փոփոխություն մարդու համար սթրես է համարվում, հետտոնական օրերին նաեւ մարդու ֆիզիոլոգիական առանձնահատկություններն են փոխվում»,-այսօր «Զարկերակ» ակումբում, խոսելով հետտոնական սթրեսներից, ասաց հոգեբան Լիլիթ Խաչատրյանը:
Նրա բնորոշմամբ՝ տոների ժամանակ ավելի շատ սպասումներ ենք ունենում, որոնք իրականանում են: Իսկ դրանից հետո գերակշռում է հուզական վիճակը, ինչն առաջացնում է դատարկության եւ անիմաստության զգացում. «Այդ շրջանում նոր պահանջմունք ձեւավորված չէ: Պետք է ուղեղի երկու կիսագնդերը բալանսի բերել: Բարձր հուզականության հետեւանքով մարդն անկարող վիճակում է հայտնվում: Պետք է անցում կատարել նոր փուլ: Պետք է հետադարձ հայացք նետել եւ հասկանալ՝ ինչ տեղի ունեցավ. օրինակ՝ գնահատել ձեռքբերումը, տոնական օրերի կարեւոր իրադարձությունը: Դա օգնում է հեշտ անցում կատարել աշխատանքային ռեժիմի»:
Լիլիթ Խաչատրյանը խորհուրդ տվեց միանգամից չանցնել աշխատանքային ծանր ռեժիմի. «Նախընտրելի է շաբաթվա վերջին օրերին աշխատանքի գնալ, որպեսզի մարդը հաջորդ շաբաթ ավելի պատրաստված լինի: Ընդմիջումները եւս շատ անհրաժեշտ են: Երկարատեւ աշխատանքը կնպաստի սթրեսային իրավիճակին: Իսկ օրվա վերջում խնջույքային իրավիճակներ կազմակերպելը կօգնի հեշտ անցնել աշխատանքի»:
Հոգեբանի խոսքով՝ այն մարդիկ, ովքեր դժգոհ են իրենց աշխատանքի արդյունքից, սթրեսի հետեւանքն ավելի ուժեղ են զգում. «Աշխատանքը սիրողները ավելի հեշտ են կարողանում լուծել իրենց խնդիրները, նրանց մոտ անցումն ավելի հեշտ է ստացվում»:
Կարդացեք նաև
Մասնագետը նաեւ հավելեց, որ հետտոնական սթրեսների հետեւանքով կարող են առաջանալ երկարատեւ գլխացավ, սրտխառնոց, ջերմություն:
Լուիզա ՍՈՒՔԻԱՍՅԱՆ
