Aravot.am-ը Կրթության եւ գիտության նախարար Արմեն Աշոտյանին հարցրեց, թե բուհերի եւ հանրակրթական ուսումնական հաստատությունների վարկանիշավորման արդյունքների վերաբերյալ ինչ բողոքներ են ստացվել: «Եզակի քննադատական կարծիքներ եմ ընթերցել սոցցանցերում: Ցավոք, նման կարծիքներում պակասում է մասնագիտական գիտելիքը, որովհետեւ քննադատողներն անգամ չեն տարբերակել հիմնական եւ միջին դպրոցները, խորամուխ չեն եղել մեթոդաբանության մեջ: Վարկանիշավորման մեթոդաբանությունը մշտապես վերանայվելու կարիք ունի, սակայն մեծամասամբ տեղեկատվությունն ընդունվել է որպես բավականաչափ հավաստի»,-ասաց Արմեն Աշոտյանը:
Նա նշեց, որ հետաքրքրվողները կարող են այցելել ranking.armedu.am եւ rank.armedu.am կայքեր, ծանոթանալ վարկանիշավորման արդյունքներին, համեմատել դպրոցները եւ հասկանալ դրանց ուժեղ եւ թույլ կողմերը. «Վարկանիշավորման նպատակն է՝ հայտնաբերել թույլ կողմերը եւ աշխատել դրանք շտկելու ուղղությամբ: Դա վերաբերում է նախարարությանը, տարածքային կառավարման մարմիններին եւ, իհարկե, դպրոցին»,-եզրափակեց Արմեն Աշոտյանը:
Հիշեցնենք, որ նախարարն այսօր Հայաստանի ազգային պոլիտեխնիկական համալսարանում լավագույն առաջադիմությամբ ուսանողների անվանական կրթաթոշակների մրցույթի հաղթողներին պարգեւներ հանձնեց:
Լուիզա ՍՈՒՔԻԱՍՅԱՆ
