«Ընտրական նոր օրենսգրքի նախագիծն անընդունելի է»,- այսօր «Հայացք» ակումբում հայտարարեց «Ժառանգություն» կուսակցության փոխնախագահ Արմեն Մարտիրոսյանը:
Նա ասաց, որ վարկանիշային քվեարկությունը լավ քվեարկություն է, բայց այն պետք է լինի համապետական այն դեպքում, երբ մենք գոնե երկու ընտրություն կարողանանք իրականացնել ազատ, թափանցիկ:
Եթե մեքենան ռուսական արտադրության «Ժիգուլի» է, որքան էլ լավ գույներով ներկեն, գեղեցիկ պատկերներ փակցնեն թափքի վրա, դա «Մերսեդես» չի դառնա: ՀՀԿ կառավարումն էլ ինչ անեն՝ պետական միջոցների անհավանական անօրինական յուրացման կառավարման համակարգ է, մենաշնորհացման: Ոչ թե կոնֆետի թուղթը պետք է փոխվի,այլ կոնֆետը, հակառակ պարագայում՝ ինչպես նեխած եղել է այդ կոնֆետը, այդպես էլ մնալու է: Մեր խնդիրները դրանից չեն լուծվում, միայն ավելանում են»:
Հարցին՝ ինչո՞ւ եք այդքան պնդում ցուցակների հրապարակման պահանջը,երբ գիտեք իշխանություններն ինչ են ասում՝ կա ՍԴ որոշում, բացի այդ, վերահաշվարկի ժամանակ այն հասանելի է դառնում ընտրության մասնակիցներին՝ Արմեն Մարտիրոսյանը պատասխանեց. «Բողոքարկման կարճ ժամանակահատված է՝ 4 ժամ: 4 ժամում մարդը 2000 մարդու անուն-ազգանուն կարողանալո՞ւ է գրել: Այդ քաղվածքը ոչ մի օգուտ չի կարողանալու տալ: Այդ մեծածավալ աշխատանքները կարող են իրականացնել քաղաքացիների հետ միասին, երբ այն հրապարակային լինի: ՍԴ-ի թիկունքում թաքնվելը ճիշտ չէ: ՍԴ-ն կենսապահովման համակարգի հետ կապված էլ որոշում ընդունեց, բայց իշխանություններն իրենց ասածն արեցին: Սա բացառապես քաղաքական նպատակ է հետապնդում»:
Կարդացեք նաև
Ըստ նրա, էլեկտրոնային գրանցումը գրեթե նույն խնդիրն է առաջացնելու: Բացակա քաղաքացիների փոխարեն քվեարկության խնդիր կա: Դա պետք է ոչ թե անձնագրով տեղի ունենա, այլ բացառապես մատնահետքով:
Հռիփսիմե ՋԵԲԵՋՅԱՆ
