Հեշտ եւ արագ պատրաստվող, գեղեցիկ եւ շատ համեղ այս մաֆինները իսկական փրկություն կարող են լինել, եթե ժամանակ չունեք ավելի ժամանակատար աղանդեր պատրաստելու համար:
Անհրաժեշտ մթերքները
Ձու- 5 հատ
Շաքարավազ-3/4 բաժակ
Կարդացեք նաև
Կարագ կամ հալած յուղ- 150 գրամ
Ալյուր-2-2,5 բաժակ
Կաթ-3/4-1 բաժակ
Սոդա- 1 թեյի գդալ
Աղ-մի պտղունց
Նարինջ- 1 հատ
Կակաոյի փոշի-3 ճաշի գդալ
Շոկոլադի սալիկ-50 գրամ
Պատրաստման եղանակը
Ձուն եւ շաքարավազը միասին լավ հարեք, ավելացրեք հալած կարագը կամ յուղը, շարունակել հարել, ավելացրեք կաթը: Ապա միանգամից ավելացրեք չոր բաղադրիչները՝ աղը, սոդան եւ ալյուրը, խառնեք: Պետք է դառնա բավականին թույլ խմոր՝ մածունի խտության: Եթե պինդ է, մի քիչ էլ կաթ ավելացրեք, եւ հակառակը, եթե շատ թույլ է, ալյուրն ավելացրեք:
Խմորը բաժանեք երկու մասի: Մի մասին ավելացրեք կակաոն ու լավ խառնեք: Իսկ մյուս մասին ավելացրեք մեկ նարնջի քերած կեղեւը եւ հյութը, նորից լավ հարեք: Եթե զգաք, որ նարնջով խմորը շատ թույլ է, մի փոքր ալյուր ավելացրեք:
Կեքսի համար նախատեսված ջեռոցի ամանի մեջ տեղավորեք մաֆինների թղթե ֆորմաները: Յուրաքանչյուր ձեւաթղթի մեջ լցրեք մեկական գդալ կակաոյով խմոր, ապա՝ նարնջով խմոր, ամենավերջում՝ կրկին կես գդալ սեւ խմոր: Կարող եք, բնականաբար, հերթականությունը փոխել:
Շոկոլադի սալիկը կտրատեք, յուրաքանչյուր մաֆինի մեջ մի կտոր շոկոլադ մտցրեք:
Մաֆինները եփեք 180 աստիճան տաքացրած ջեռոցում 15-20 րոպե: Փայտե չոփիկով փորձեք դրանց պատրաստ լինելը՝ եթե փայտիկը չոր դուրս գա, ուրեմն պատրաստ է, չթողնեք շատ մնա ջեռոցում, որպեսզի չչորանա: Ուշադիր եղեք, որ չոփիկը մտցնեք խմորի այն հատվածը, որտեղ շոկոլադ չեք դրել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
Հ.Գ.– Ի դեպ, մաֆինների եւ կեքսերի տարբերություններից մեկի, թերեւս, ամենագլխավորի մասին. կեքսերի բաղադրության մեջ կաթ չի նախատեսվում, կեքսն ավելի չոր խմորեղեն է, մաֆինն անհամեմատ նուրբ եւ փափուկ է:
«Առավոտ» օրաթերթ
02.04.2016
