Այսօր ԱԺ նիստում ԲՀԿ խմբակցության ղեկավար Նաիրա Զոհրաբյանը կոշտ արտահայտվեց ԵԽԽՎ նախագահ Պեդրո Ագրամունտի մասին: Նրա խոսքերով՝ միջազգային հանրության համար էլ այլեւս պարզ է, որ Ադրբեջանը ահաբեկչական պետություն է, իսկ ահաբեկիչները ուժից բացի՝ այլ լեզու չեն հասկանում. «Մեր ԱԺ-ն պետք է ինչ-որ կերպ արձագանքի նաեւ ԵԽԽՎ նախագահի պաշտոնը զբաղեցրած իսպանացի ջեբկիր Պեդրո Ագրամունտի խայտառակ հայտարարություններին: Նա իր այդ հայտարարությամբ դարձել է ռազմական հանցագործ Ալիեւի հանցակիցը: Մի պաշտոնյա, որ ի պաշտոնե պարտավոր է լինել 47 անդամ երկրների նախագահը, երեկ սատար է կանգնում Ադրբեջանին՝ իր անմիջական աջակցությունը հայտնելով ռազմական հանցագործ Ադրբեջանին, ընդամենը մեկ օր Ադրբեջանի հսկողության տակ գտնված Թալիշ գյուղի սպանդին»:
Նա «ստահակ» անվանեց Պեդրո Ագրամունտին:
Իսկ ԵԽԽՎ հայկական պատվիրակության ղեկավար Հերմինե Նաղդալյանն ասաց, որ երեկ երեկոյան հեռախոսազրույց է ունեցել Ագրամունտի հետ ու տեղեկացրել ադրբեջանական ագրեսիվ քաղաքականության մասին. «Փորձել եմ բազմակողմանի տեղեկատվություն պատրաստել եւ տեղեկացնել ԵԽԽՎ առաջնային դերակատարություն ունեցող նախագահական կոմիտեի, բյուրոյի անդամներին»:
Հռիփսիմե ՋԵԲԵՋՅԱՆ
