Արամ Մանուկյանը ցավակցեց զոհերի ծնողներին՝ ասելով,որ նրանք բոլորը հերոսներ են, արժանապատվորեն պահել են հայրենիքի սահմանը: Բոլոր զոհերը սրբացել են՝ միանալով Արցախյան ազատամարտի սուրբ նահատակներին. «Մեր անափ ցավի հետ միասին` լի ենք հպարտության զգացումով: Ցանկացած սուրբ նահատակ պատմական, ազգային հպարտություն է: Այդ հպարտությունն առաջին հերթին ծնողներին է: Ուզում ենք հավաստել, որ ծնողների կողքին ենք: Այդ անչափ ցավի հետ ունենք հպարտության զգացում, որ ծնվել են հերոսներ»:
ԱԺ փոխխոսնակ Հերմինե Նաղդալյանն էլ ասաց, որ այսօր այցելել են հոսպիտալում վիրավոր տղաներին. «Մեկը մեկից հերոսական, մեկը մեկից ամուր»:
Ալեքսանդր Արզումանյանն իր զորակցությունը հայտնեց ԼՂՀ ՊԲ-ին, որը ագրեսորին պարտադրում է խաղաղություն. «Վստահ եմ, որ հաջողությամբ իրականացնելու է իր այդ վեհ առաքելությունը»:
ՀՅԴ խմբակցության ղեկավար Արմեն Ռուստամյանի խոսքերով. «Այն, ինչ տեղի ունեցավ՝ անսպասելի չէր, մենք գիտեինք, որ մի օր Բաքուն նորից դիմելու է այս արկածախնդրությանը, նորից թերագնահատելու է մեզ, գերագնահատելու է իր ուժերը: Սա նորություն չի մեր պատմության մեջ:
Կարդացեք նաև
Բոլոր խմբակցություններն այս հարցի հետ կապված դատապարտեցին Ադրբեջանի պահվածքը եւ իրենց զորակցությունը հայտնեցին մեր զինվորներին»:
ՀԱԿ խմբակցության ղեկավար Լեւոն Զուրաբյանը հիշեցրեց առաջին նախագահ Լեւոն Տեր-Պետրոսյանի խոսքերը եւ հայտարարեց, որ անկախ գործող իշխանությունների հետ ունեցած հակասություններից՝ ՀՀ-ին եւ ԼՂՀ-ին սպառնացող արտաքին ագրեսիայի եւ վտանգի դեպքում պատրաստ ենք միավորվել՝ ագրեսիան հետ մղելու գործում. «Մեր բանակի զինվորների ոգին անկոտրում է: Ագրեսորին ետ մղելու գործում գլխավոր երաշխիքը հենց այդ հայրենասիրական ոգին է, որ այսօր միավորում է ամբողջ հայությանը»:
Նաիրա Զոհրաբյանն առաջարկ արեց, որ սահմանապահ գյուղերին տրամադրվեն որոշակի քանակությամբ զենք կամ գյուղացիներին թույլ տան, որ իրենց ունեցած զենքերը օրինականացնեն. «Թող գյուղապետի մոտ կամ մի տեղ գյուղը բազա ունենա, որ նրանք, ովքեր ունեն դրա անհրաժեշտությունը, կրեն զենք»:
Էդուարդ Շարմազանովը հորդորեց Կորյուն Նահապետյանին, որ առաջարկը քննարկեն եւ անդրադառնան դրան:
Հռիփսիմե ՋԵԲԵՋՅԱՆ
