«Ռուսական «Ռոսսիա 1» հեռուստաընկերությանը տված հարցազրույցում, ՌԴ վարչապետ Դմիտրի Մեդվեդեւը, ըստ BBC-ի ասել է. «Եթե մենք մի պահ պատկերացնենք, որ Ռուսաստանը հրաժարվի այդ դերից (զենքի մատակարարի- խմբ.), մենք շատ լավ հասկանում ենք, որ այդ տեղը դատարկ չի մնա: Այլ երկրներից զենք կգնեն, մահացության մակարդակը դրանից չի նվազի»:
Նրա խոսքերով՝ վստահություն չկա նրանում, որ այլ երկրներից զենքի մատակարարների մուտքն այդ (հայ-ադրբեջանական սպառազինությունների-խմբ.) շուկա, կթեթեւացնի իրավիճակը: Նա կարծիք է հայտնել, որ իրավիճակը, հավանաբար, ավելի կբարդանա:
«Ես կարծում եմ, որ զենքը կարող է եւ պետք է ձեռք բերվի ոչ միայն նրա համար, որպեսզի երբեւէ օգտագործվի, այլեւ նրա համար, որ այն դառնա զսպման գործոն, եւ այդ պահը պետք է գնահատեն հակամարտության բոլոր կողմերը»,-ասել է նա:
Նախօրեին փոխվարչապետ Դմիտրի Ռոգոզինն էր խոսել հակամարտության երկու կողմերին՝ որպես ռազմավարական գործընկեր, զենքի մատակարարումը շարունակելու մասին:
Կարդացեք նաև
Ադրբեջանը ռուսական զենքի խոշորագույն ներկրողն է՝ հիշեցնում է BBC-ին: 2010-2014թթ. ընթացքում Մոսկվան եւ Բաքուն մի շարք պայմանագրեր են կնքել ուղղաթիռների, հրթիռա-հրետանային համակարգերի, տանկային տեխնիկայի եւ հրանոթային սպառազինությունների վերաբերյալ՝ ընդհանուր առմամբ 4 մլրդ դոլար արժողությամբ: Հայաստանը 2013-ին գնել է 16 մլն դոլարի ռուսական արտադրության զենք-զինատեսակներ, առաջին անգամ նրան մատակարարվել է ծանր սպառազինություն: 2014-ին նման մատակարարում չի եղել:
Նկատենք, որ վարչապետ Մեդվեդեւի այդ հայտարարությունները հնչել են ապրիլի 5-ին ընդունված հրադադարի պայմանների խախտման վերաբերյալ հայկական եւ ադրբեջանական կողմերի շարունակվող փոխադարձ մեղադրանքների ֆոնին: Այդ ժամանակ ռազմական գործողությունները ադրբեջանական եւ ղարաբաղյան զորամիավորումների շփման գծում դադարել էին, սակայն անմիջապես դրանից հետո կողմերը սկսեցին միմյանց մեղադրել հրադադարի խախտման մեջ:
