Քիչ առաջ ՀՀ ԱԺ-ում ավարտվեց ԵԽԽՎ համազեկուցողներ բրիտանացի Ալան Միլի և իտալացի Ջուզեպպե Գալատիի հանդիպումը ԱԺ «Ժառանգություն» խմբակցության հետ:
Aravօt.am-ի հետ զրույցում խմբակցության պատգամավոր Թևան Պողոսյանը տեղեկացրեց, որ, ընդհանուր առմամբ, քննարկել են սահմանադրական փոփոխությունների, ընտրական օրենսգրքի և կոռուպցիայի վերաբերյալ հարցեր:
Պարոն Պողոսյանը ներկայացրեց նաև, թե հանդիպման սկզբում ինչ է փոխանցել համազեկուցողներին և ինչ առաջարկ արել. «Ամենասկզբից պարտքս համարեցի ներկայացնել այն խնդիրները, թե ինչու է ԵԽԽՎ-ում վարվում հավասարության նշան դնելու քաղաքականություն: Հիշեցրի նաև Միլիցա Մարկովիչի զեկույցի ընդունումը և թե այն ինչ բացասական ազդեցություն ունեցավ»:
Պարոն Պողոսյանը համազեկուցողների ուշադրությանն է հրավիրել այն հանգամանքը, որ ապրիլյան քառօրյա պատերազմին իրենք էլ ականատես եղան, թե ինչի կարող է հանգեցնել այդ քաղաքականությունը:
Կարդացեք նաև
Այնուհետև Թևան Պողոսյանը Ալան Միլին ու Ջուզեպպե Գալատիին առաջարկել է անձամբ այցելել Արցախ ու ծանոթանալ իրավիճակին: Նրանք ի պատասխան նշել են, որ հանդիպել են նաև Արցախի ներկայացուցիչների հետ:
Պարոն Պողոսյանը նաև տեղեկացրեց, որ ընտրողների ցուցակների հրապարակման հետ կապված հարցի քննարկման ժամանակ Ալան Միլը պատմել է, որ իրենց երկրում էլ երկար ժամանակ այդ ցուցակները հրապարակել-չհրապարակելու հարց է քննարկվել. ի վերջո որոշել են հրապարակել:
Տաթև ՀԱՐՈՒԹՅՈՒՆՅԱՆ
