Թուրքմենստանի նախագահ Գուրբանգուլի Բերդիմուհամեդովը ավարտել է գորգագործության մասին իր հեղինակած գիրքը, որը չորրորդ գիրքն է, որ գրել է այդ երկրի նախագահը վերջին մեկ տարվա ընթացքում։ Այդ մասին հայտնում է ռուսական vesti.ru լրատվականը։
Լրատվամիջոցի փոխանցմամբ՝ թուրքմենական ԶԼՄ-ները հաղորդում են, որ գորգագործության թուրքմենական ավանդույթներին նվիրված Բերդիմուհամեդովի հեղինակած գիրքը հիանալի նվեր է թուրքմեն ժողովրդի համար, որը, վստահաբար, մեծ հետաքրքրություն կառաջացնի ընթերցողների շրջանում։
Տեղեկացնենք, որ այդ գիրքը Գուրբանգուլի Բերդիմուհամեդովի հեղինակած երկրորդ գիրքն է, որը նվիրված է գորգագործությանը։ Այս թեմային նվիրված նախագահի հեղինակած առաջին գիրքը՝ «Կենդանի լեգենդ» վերնագրով, լույս էր տեսել դեռևս 2011թ-ին:
2016թ. հունվարին լույս տեսավ Թուրքմենստանի նախագահի հեղինակած ասացվածքների և իմաստությունների ժողովածուն, դրանից հետո՝ նույն թվականի մարտին, լույս է տեսել «Թեյ. դեղ և ներշնչանք» գիրքը, բառացիորեն մեկ ամիս անց լույս է տեսել նաև ձիերի վերաբերյալ Բերդիմուհամեդովի աշխատությունը։
Կարդացեք նաև
