«Այնպիսի տպավորություն է, որ Ռուսաստանը անընդհատ ցանկանում է հայտարարել, որ ինքն այս տարածքում տեր ու տիրական է եւ երբեւիցե չի հեռանալու այս տարածքից»,- հունիսի 14-ին «Հայելի» մամուլի ակումբում լրագրողների հետ հանդիպման ընթացքում, անդրադառնալով հակաօդային պաշտպանության (ՀՕՊ) դաշինքին, ասաց ԱԺ պատգամավոր Զարուհի Փոստանջյանը:
Նա նկատեց, որ Ռուսաստանի Դաշնության նախագահ Վլադիմիր Պուտինը Հայաստան կատարած պաշտոնական այցի ժամանակ առաջինը ոչ թե այցելեց մայրաքաղաք Երեւան, այլ Գյումրի, որտեղ տեղակայված է 102-րդ ռազմաբազան, եւ հայտարարեց, որ իրենք երբեք չեն հեռացել Կովկասից. «Սա կարելի է թվարկել այդպիսի հայտարարությունների շարքին, որը իհարկե՛, սահմանափակում է մեր հնարավորությունները, և, ընդհանուր առմամբ, ցանկացած ռազմավարական նշանակություն ունեցող իրավունք, իրավասություն մեկ այլ օտար պետության տրամադրելը ուղղակի դավաճանություն է:
Ես կարծում եմ, որ այս համաձայնագրով նման հնարավորություն է նորից ընձեռնվում Ռուսաստանի Դաշնությանը, եւ մենք մեր իրավունքները զիջում ենք: Մինչդեռ սահմանադրական նշանակություն ունեցող գործառույթ է, եւ մենք չպետք է դա զիջենք մեկ այլ պետությանը, որը կցանկանա դա անել կամ չանել: Մենք չպետք է թողնենք մեր պետության պաշտպանությունը այլ պետության ցանկությունների տիրույթում»:
Զարուհի Փոստանջյանը համարում է, որ այսպիսի փաստաթղթերով Ռուսաստանի Դաշնության կողմից պատշաճ գործընկերություն ակնկալելը ուղղակի միամտություն կլինի. «Մենք նաեւ պետք է գնահատենք վերջին բոլոր իրադարձությունները՝ 5 միլիարդից ավելի հարձակվողական զենք մատակարարելը Ադրբեջանին եւ պաշտոնական հայտարարությունները, որ իրենք շարունակելու են, արդեն խախտել է այն հավասարակշռությունը, որը գոյություն ուներ մինչեւ 2014 թվականը: Եվ եթե գնահատում ենք՝ 2014 թվականի օգոստոսից սկսեցին լայնամասշտաբ ռազմական գործողությունները մեր արեւելյան սահմաններում՝ արցախապատկան տարածքների նկատմամբ եւ ընդհանուր Տավուշի մարզի վրա հարձակումները, որոնք վերածվեցին ապրիլյան պատերազմի: Եվ այստեղ մենք հասկանում ենք, որ հավասարակշռությունը խախտվել է հենց Ռուսաստանի Դաշնության կողմից, եւ խախտումը շարունակվում է»:
Կարդացեք նաև
Ամի ՉԻՉԱԿՅԱՆ
