Նոր փոփոխությամբ` ոչ միայն մեկ տարով հետաձգվել է կուտակային բաղադրիչին մասնավոր հատվածի աշխատողների պարտադիր մասնակցությունը, այլ նաև երկարաձգվել է համակարգի մասնակիցներին տրվող արտոնությունների ժամկետը
Մայիսի 12-ին ընդունվեց «Կուտակային կենսաթոշակների մասին» օրենքում փոփոխություն կատարելու մասին նոր օրենքը, որով մասնավոր հատվածի աշխատողների համար համակարգին մասնակցությունը պարտադիր կլինի ոչ թե 2017, այլ 2018 թվականի հուլիսի 1-ից: Նույն փոփոխությամբ մեկ տարով երկարաձգվել են նաև համակարգի մասնակիցների համար օրենքով նախատեսված որոշ արտոնություններ:
Մասնավորապես` 1996 թվականին և դրանից հետո ծնված անձանց սոցիալական վճարը կնվազեցվի նրանց եկամտային հարկից ևս մեկ տարի ավելի` մինչև 2018 թվականի հուլիսի 1-ը: Նախորդ օրենքով նշված անձինք այս արտոնությունից օգտվելու էին մինչև 2017 թվականի հուլիսի 1-ը:
Նոր ընդունված օրենքը նաև մեկ տարով երկարաձգել է այն ժամկետը, երբ 1964 թվականին և դրանից հետո ծնված անձինք, կուտակային համակարգին կամավոր միանալու պարագայում, պետության կողմից կստանան 100 տոկոս համաֆինանսավորում իրենց կուտակային հատկացումներին:
Կարդացեք նաև
Այսպիսով` պետությունը կկրկնապատկի 1964 թվականին և դրանից հետո ծնված անձանց կուտակային խնայողությունները` եթե նրանք մինչև 2018 թվականի հուլիսի 1-ը կամավոր միանան կուտակային բաղադրիչին:
Ընդ որում` այս անձինք կենսաթոշակային տարիքում կենսաթոշակ կստանան միանգամից երկու բաղադրիչներից` պետական բաշխողական և կուտակային:
«Նորք» կենտրոնի ղեկավարություն
