2015թ. հոկտեմբերի 30-ին Ամենայն հայոց կաթողիկոս Գարեգին Երկրորդը Դիլիջանում կատարեց եկեղեցու հողօրհնեքի արարողություն, որով տրվեց եկեղեցու կառուցման ծրագրի մեկնարկը: Այն կառուցվելու է Սուրբ Էջմիածնի, Դիլիջանի քաղաքապետարանի, Հայաստանի զարգացման հիմնադրամի համատեղ ջանքերով, Ռուբեն Վարդանյանի եւ Գագիկ Ադիբեկյանի բարերարությամբ:
Գրեթե մեկ տարի է անցել, սակայն Դիլիջանում եկեղեցու շինարարությունը դեռ չի սկսվել: Այդ մասին տեղեկացանք Դիլիջանի քահանա Տեր Շավարշ Սիմոնյանից: Նրա վկայությամբ՝ դրա պատճառն այն է, որ եկեղեցու նախագծում փոփոխություններ պետք է կատարվեն:
16200 բնակիչ ունեցող Դիլիջանում եկեղեցի չկա, արդեն 6 տարի Տեր Շավարշ քահանան հոգեւոր արարողություններ է կատարում «Թուֆենկյան» թանգարանային համալիրի մաս կազմող սենյակներից մեկում:
Հավաստի, ճշտված տեղեկատվության համաձայն՝ այդ սենյակի համար Հայ առաքելական եկեղեցին ամսական «Թուֆենկյան» ընկերությանը վճարում է 90 հազար դրամ: Հայ առաքելական եկեղեցու Տավուշի թեմի սպասավորները մտավախություն ունեն,որ թեման բարձրաձայնելուց հետո «Թուֆենկյան» ընկերությունը կարող է խզել վարձակալության պայմանագիրը եւ առաջարկել ազատել սենյակը: Դա ձեռնտու չէ, քանի որ հավատացյալ դիլիջանցիներն այդ սենյակը գիտեն որպես եկեղեցի:
Կարդացեք նաև
2007թ. Ջեյմս Թուֆենկյանը Դիլիջան քաղաքի կենտրոնում սկսել է հյուրանոցի կառուցումը: 2009 թվականից կառույցի շինարարությունը դադարեցված է: Շինության հիմքից ցցված ամրանները դիլիջանյան խոնավությունից ժանգոտել են: Կիսակառույցի հենապատը մեծ ճաք է տվել: Դիլիջանցիները դժգոհում են, որ կիսակառույցը փչացնում է վերջին տարիներին գեղեցկացած, զբոսաշրջային կենտրոն դարձած Դիլիջանի տեսքը:
Ոսկան ՍԱՐԳՍՅԱՆ