Հայաստանի Հանրապետության արտաքին գործերի նախարար Էդվարդ Նալբանդյանը և Իտալիայի Հանրապետության արտաքին գործերի և միջազգային համագործակցության նախարար Պաոլո Ջենտիլոնին ս. թ. նոյեմբերի 8-ին ստորագրեցին «Հայաստանում մշակութային ժառանգության պահպանման և վերականգնման տարածաշրջանային կենտրոն հիմնելու մասին» համատեղ հայտարարություն:
Հայաստանում մշակութային ժառանգության պահպանման և վերականգնման տարածաշրջանային կենտրոնի ստեղծումը կհանդիսանա 2011-2014 թվականներին` Իտալիայի արտաքին գործերի նախարարության և Միլանի պոլիտեխնիկի համաֆինանսավորմամբ իրականացված «Մշակութային ժառանգության պահպանումը Հայաստանում» ծրագրի շարունակությունը: Հուշարձանների վերականգնման տարածաշրջանային կենտրոնը հնարավորություն կընձեռի մշակութային ժառանգության ոլորտում կազմակերպել դասընթացներ` ուղղված մշակութային ժառանգության ուսումնասիրմանը, պահպանմանը և ամրակայմանը, ինչպես նաև կներառի մի շարք հաստատություններ և կազմակերպություններ, որոնց մեծ ներուժը կարող է նպաստել կենտրոնի ստեղծման ներկա և հետագա աշխատանքներին:
