Ֆիլհարմոնիկի ընկերակցությամբ եւ չինացի դիրիժոր Ջեյմս Փ. Լիուի ղեկավարությամբ՝ Սվետլանա Նավասարդյանը հանդես կգա Ռախմանինովի դաշնամուրային 2-րդ կոնցերտի մեկնաբանմամբ:
Սվետլանա Նավասարդյան անունը այցեքարտ է երկրի համար ու հետեւաբար, նրա յուրաքանչյուր բեմելը՝ տոն: Արվեստագետի մեկնաբանած ստեղծագործությունների ցանկը ներառում է դաշնամուրի եւ նվագախմբի համար գրված շուրջ 60 կոնցերտ, այդ թվում՝ Բախի, Մոցարտի, Բեթհովենի բոլոր կոնցերտները: Արտասահմանյան մամուլը հայ դաշնակահարին մոգական է կոչել, երաժշտական աշխարհը՝ անուրանալի անհատականություն, դաշնամուրային հրաբուխ: Իսկ երաժշտագիտական քննադատությունը, փորձելով տալ նրա կատարողական ինքնության սահմանումը, Սվետլանա Նավասարդյանին խորհրդանիշ է կարգել՝ խորհրդանիշ ընդվզումի, որ դեմ է այն ամենին, ինչը ընդհանրապես արվեստում, մասնավորապես՝ դաշնամուրային, առօրեականություն ու կանխատեսելիություն է մարմնավորում:
Մեր արվեստագետի երաժշտական կարիերան լի է նաեւ անվանի երաժիշտների հետ համագործակցության բազմաթիվ դրվագներով աշխարհի ավելի քան 40 երկրներում:
«Առավոտի» հետ Սվետլանա Նավասարդյանը նախկին զրույցներից մեկում առանց մանրամասնելու հայտնել էր, որ վերջին շրջանում հաճախակի է իր համագործակցությունը Փարիզի Ecole Normale de Musique, Ստոկհոլմի Lille Academia, Էսսենի Hochschule fur Musik, ինչպես նաեւ Գերմանիայի, Ճապոնիայի երաժշտական հեղինակավոր այլ հաստատությունների հետ, ու հավելել, թե հայ հանդիսատեսին երբեք սպասումով չի թողել:
Հայաստանի ազգային ֆիլհարմոնիկ նվագախմբի ընկերակցությամբ հոկտեմբերի 12-ին՝ չինացի դիրիժոր Ջեյմս Փ. Լիուի ղեկավարությամբ, Սվետլանա Նավասարդյանն արդեն որերորդ անգամ հանդես կգա Ռախմանինովի դաշնամուրային 2-րդ կոնցերտի մեկնաբանմամբ:
Սվետլանա Նավասարդյանը եւ Ջեյմս Փ. Լիուն՝ գլխավոր փորձի ժամանակ:
Նույն ստեղծագործությունը քանիցս մատուցելով, արվեստագետների մեծ մասը նշում է, որ ամեն անգամ նորովի են մեկնաբանում: Այս տեսակետի առիթով դաշնակահարի խոսքը հակիրճ էր ու դիպուկ. «Նորովի կարող է մեկնաբանել միայն տաղանդավոր կամ հանճարեղ երաժիշտը»: Ինչ վերաբերում է տասնամյակներ շարունակ Ռախմանինովի դաշնամուրային այս ստեղծագործության սեփական մեկնաբանմանը, դաշնակահարը կարեւորեց դիրիժորի դերը. «Առաջին անգամ եմ բեմ բարձրանալու Ջեյմս Փ. Լիուի ղեկավարությամբ: Բայց պետք է նշեմ, որ կոնցերտի մեկնաբանման հարցում ոչ թե դիրիժորն է ղեկավարում, այլ մենակատարը՝ լինեմ ես կամ մեկ այլ երաժիշտ: Ի պատիվ չինացի դիրիժորի, նշեմ, որ առաջին փորձից նա հասկացավ ինձ եւ կարողացավ «հավաքել» նվագախումբը:
Կարդացեք նաև
Հիշեք՝ եթե ստեղծագործությունը գրված է, այս դեպքում՝ դաշնամուրի համար, ապա յուրաքանչյուր ստեղծագործական դրվագ պետք է թելադրի հենց դաշնակահարը: Կրկնում եմ՝ անկասկած, մեծ դերակատարում ունի դիրիժորը»:
«Առավոտի» հետ զրույցում Ջեյմս Փ. Լիուն, որ առաջին անգամ է համագործակցելու Սվետլանա Նավասարդյանի հետ, իր հիացմունքը հայտնեց դաշնակահարուհու հասցեին, հետո էլ ասաց. «Ուսանել եմ եւ վարպետության դասերի հաճախել անվանի շատ պրոֆեսորների մոտ, այդ թվում՝ Գուստավ Մայերի, Լարրի Ռախլեւի, Միշել Ռոխենի, Լիու Յանի, Էլիաս Արիցկուրենի, բայց ձեր համերկրացի Լեւոն Գրիգորյանն իմ ներսում եղածին ավելացրեց հայկական կրակը, ինչն այնքա՜ն առատ է, որ հաճախ ստիպված եմ լինում սանձել»:
ՍԱՄՎԵԼ ԴԱՆԻԵԼՅԱՆ
«Առավոտ»
12.11.2016
