Ամերիկեան System Of A Down ռոք խումբը պիտի ըլլայ 2017-ի Park Live երաժշտական փառատօնի առաջատարը: Այդ մասին կ՛ըսուի փառատօնի պաշտօնական կայքին մէջ հրապարակուած ձեռնարկի կազմակերպիչներու հաղորդագրութեան մէջ:
Փառատօնը տեղի պիտի ունենայ Յուլիս 5-ին Մոսկուայի նորակառոյց «Արենա ԲԿՄԱ»-ի մէջ, որուն տարողութիւնը համերգի պարագային 28.000 է, երկրպագուներու գօտին` 6.000 մարդ, կը յայտնէ ԹԱՍՍ-ը:
Առաջին անգամ Park Live փառատօնը տեղի ունեցած է Մոսկուայի մէջ 2013-ին: Մինչեւ հիմա փառատօնին մասնակցած են ռուս եւ օտար բազմաթիւ յայտնի երաժիշտներ` Muse, Red Hot Chili Peppers, Lana Del Rey, Limp Bizkit,The Killers, Deftones, Die Antwoord, Paramore, Զեմֆիրա եւ շատ ուրիշներ:
Աւելի առաջ System of a Down ռոք խումբը յայտարարած է, որ կը վերադառնայ: Այդ մասին կ՛ըսուի ռոք խումբի ֆէյսպուքեան էջի մէջ: 2017-ի Յունիս 7-ին System of a Down-ը ելոյթ պիտի ունենայ ֆրանսական Նանսի քաղաքի Zenith Open Air-ի մէջ, Յունիս 10-ին` Փարիզի Download փառատօնին, Յունիս 12-ին` Պրահայի, Յունիս 17-ին` Լեհաստանի Impact փառատօնին, յունիս 20-ին` Nimes փառատօնին Ֆրանսայի մէջ, Յունիս 23-ին` Սպանիոյ Download փառատօնին, Յուլիս 2-ին`ֆրանսական Open Square-ի մէջ:
Կարդացեք նաև
