ԵԽԽՎ Մոնիթորինգային կոմիտեի համազեկուցողներ Ստեֆան Շենախը (Ավստրիա) և Ցեզար Ֆլորին Պրեդան (Ռումինիա) հայտարարություն են տարածել հունվարի 12-14-ին Բաքու կատարած փաստահավաք այցից հետո՝ ուշադրություն հրավիրել Ադրբեջանում հատկապես արդարադատության ոլորտում առկա որոշ խնդիրների վրա:
Այցի ընթացքում համազեկուցողները հանդիպումներ են ունեցել Ադրբեջանի նախագահի, խորհրդարանի փոխխոսնակի, ներքին գործերի, արդարադատության նախարարների և այլ պաշտոնյաների, քաղաքացիական հասարակության ներկայացուցիչների, լրագրողների, ինչպես նաև ազատազրկման մեջ գտնվող քաղբանտարկյալների հետ:
«Անչափ կարևոր է նոր խթան հաղորդել բարեփոխումների գործընթացին և երկխոսություն սկսել իշխանությունների հետ, հատկապես արդարադատության, մամուլի ազատության և մարդու իրավունքների ոլորտներում, մասնավորապես, ՀԿ-ների մասին օրենսդրության վերաբերյալ: Մենք պատրաստ ենք շարունակել համագործակցությունն Ադրբեջանի կառավարության և մարդկանց հետո՝ այս բարեփոխումները սահմանելու և իրականացնելու հարցում»,- ասվում է համազեկուցողների հայտարարության մեջ:
Ստեֆան Շենախը և Ցեզար Ֆլորին Պրեդան ուշադրություն են հրավիրել Ադրբեջանում մարդու իրավունքների ոլորտում բացթողումների, հատկապես քաղբանտարկյալների հետ կապված իրավիճակի վրա, որոնց Amnesty International իրավապաշտպան կազմակերպությունը ճանաչել է խղճի բանտարկյալներ: Հիշեցնելով, որ 2016թ. ազատ են արձակվել որոշ իրավապաշտպաններ, քաղաքական ակտիվիստներ և լրագրողներ՝ համազեկուցողները հույս են հայտնել, որ այդ դրական միտումը կպահպանվի 2017թ. ընթացքում:
Կարդացեք նաև
Անդրադառնալով Ադրբեջանի արդարադատության համակարգում բարեփոխումների անհրաժեշտությանը՝ համազեկուցողները նշել են. «Կարևոր է հաշվի առնել խնդրի խորքային պատճառները և ավելացնել վստահությունը արդարադատության համակարգի ներսում և դրա անկախությունը: Մասնավորապես, անհրաժեշտություն կա վերանայելու քրեական արդարադատության համակարգը՝ հատուկ ուշադրություն դարձնելով մինչդատական կալանքներին, պատժի այլընտրանքային միջոցների մշակմանը և անչափահասների համար առանձին դատական համակարգի ստեղծմանը»:
Համազեկուցողների ուշադրությունից չեն վրիպել նաև համացանցում և սոցցանցերում տեղի ունեցող զարգացումները՝ կապված թվային տարածքում խոսքի և մամուլի ազատությունների հետ: Մասնավորապես, նրանք իրենց մտահոգությունն են հայտնել մեծ թվով երիտասարդ բլոգերների ձերբակալությունների կապակցությամբ:
Համազեկուցողները նշել են, որ այցի արդյունքներն առավել մանրամասն կներկայացնեն ԵԽԽՎ Մոնիթորինգային կոմիտեի առաջիկա հանդիպումներից մեկում:
Պատրաստեց՝ Վիկտորյա ԱՆԴՐԵԱՍՅԱՆԸ
