«Ընտրական օրենսգրքի վերաբերյալ մեր եզրակացությունները դրական են, որովհետև իսկապես պատրաստել եք ամբողջական, համակարգային փաստաթուղթ, որը հաշվի է առնում շահագրգիռ բոլոր կողմերի հետաքրքրությունները: Մեզ ուրախացրեց այն, որոշ իմաստով էլ զարմացրեց, որ Հայաստանում նոր ԸՕ վերաբերյալ գրեթե չկան դժգոհություններ. ալտերնատիվ ուժերը, ընդդիմադիրները, ունեն փոքր դիտողություններ, բայց դժգոհություններ որպես այդպիսին չկան: Սա մեծ հաջողություն է»,- լրագրողների հետ զրույցում այսօր հայտարարեց դիտորդական առաքելությամբ Հայաստանում գտնվող Բելառուսի Հանրապետության Ազգային ժողովի պատվիրակության ղեկավար Բոլեսլավ Պիրշտուկինը:
Հիշեցնենք, Բելառուսի խորհրդարանի պատվիրակությունը Հայաստանում է դիտարկելու վաղը կայանալիք խորհրդարանական ընտրությունները:
Պատվիրակության ղեկավարն ասաց, որ այսօր հանդիպել են ՀՀ ԱԺ փոխնախագահ Էդուարդ Շարմազանովի հետ, մանրամասն քննարկել են նոր Ընտրական օրենսգիրքը: Հիշեցնենք, վաղը կայանալիք խորհրդարանական ընտրությունները անցկացվելու են նոր Ընտրական օրենսգրքով:
Բելառուսի պատվիրակության ղեկավարը կարծում է, որ Հայաստանն ամեն ինչ արել է, որպեսզի ընտրություններն անցնեն թափանցիկ. ներդրվել են տեխնիկական նորագույն մեխանիզմներ: «Կարծում եմ, որ սկեպտիկները չեն ունենա հիմնավորումներ, մերժելու ընտրությունների արդյունքները»,- ասաց բանախոսը:
Կարդացեք նաև
Հարցին՝ Ընտրական օրենսգրքում կա՞ն բացեր, որոնք թույլ կտան խախտումներ իրականացնել, Բելառուսի խորհրդարանի փոխնախագահը պատասխանեց` չկան 100 տոկոսանոց իդեալական փաստաթղթեր, բայց իրենց փորձագետները կարծիք են հայտնել, որ փաստաթուղթը համակարգային է, այն հավասար հնարավորություններ է ստեղծում բոլորի համար:
Բոլեսլավ Պիրշտուկինը հավանության չի արժանացնում միայն մեկ հանգամանք`ընտրություններից հետո ընտրողների ստորագրած ցուցակների հրապարակումը: Նա դա համարում է քաղաքացիների անձնական տվյալների հրապարակում:
Նելլի ԳՐԻԳՈՐՅԱՆ
