ՀՀ կառավարության ապրիլի 20-ի նիստին արտաքին գործերի նախարարությունը մի նախագիծ կներկայացնի, որը վերաբերում է «Տպագրության մարգարիտ» խորագրով կոնֆերանսի և ցուցահանդեսի անցկացմանը` նվիրված Ոսկան Երեւանցու տպագրությամբ հայերեն առաջին Աստվածաշնչի (1666 թ.) 350-ամյակին:
Կառավարության հաստատմանն է ներկայացվելու ծրագրի արտաբյուջետային հաշվի միջոցների ծախսման 2017 թվականի նախահաշիվը: Նաեւ 2017 թվականի պետական բյուջեում և կառավարության 2016 թ. դեկտեմբերի 29-ի N 1313-Ն որոշման մեջ փոփոխություններ ու լրացումներ կատարելու անհրաժեշտությունը:
Ծրագրային առաջարկը արվել է «Մաշտոց» հայ մշակույթի պահպանման և զարգացման հիմնադրամի կողմից, որը համագործակցում է Մատենադարան հետ:
Հիշեցնենք, որ մամուլում լայնորեն քննարկվել էր «մշակութային միջոցառումներ» անցկացնելու անվան տակ Մատենադարանի նախասրահում «Մաշտոց» հիմնադրամի բացած հուշանվերների տաղավարի գործարկումը:
Հավելենք, որ Հայաստանում հայ տպագրությանը նվիրված ՅՈՒՆԵՍԿՕ-ի հետ համատեղ իրականացվող միջոցառումները սկսվել են 2012 թվականից: Հոբելյաններից առաջինն առնչվում էր հայ տպագրության 500-ամյակին, իսկ երկրորդը՝ Ոսկան Երևանցու ծննդյան 400-ամյակին: Ինչ վերաբերվում է Աստվածաշնչի 350-ամյակին, սա էլ հայ տպագրության հոբելյանական տարելիցներին նվիրված ծրագրերի վերջին փուլն է:
Գոհար ՀԱԿՈԲՅԱՆ
Լուսանկարը` matenadaran.am-ի
