Այն բարձունքները, որոնք նվաճում է երիտասարդությունը չափազանց կարեւոր են մեր երկրի կյանքում. ՀՀ ԱԺ նախագահ

ՀՀ ԱԺ նախագահ Գալուստ Սահակյանի շնորհավորական ուղերձը Ուսանողների եւ երիտասարդների օրվա առթիվ

«Սիրելի երիտասարդներ եւ ուսանողներ,

շնորհավորում եմ ձեզ Ուսանողների եւ երիտասարդների օրվա առթիվ:

Երիտասարդությունը քաղաքական ու քաղաքացիական ակտիվության յուրատեսակ ցուցիչ է: Շնորհիվ մեր երիտասարդների ու ուսանողների` մեզանում այդ ցուցիչը բավականին բարձր է, որովհետեւ երիտասարդ սերունդը վճռորոշ մասնակցություն է ցուցաբերում թե’ անվտանգության ու խաղաղության ապահովման գործում, թե’ հասարակական հարթակներում եւ թե’ քաղաքական գործընթացներում:

Այն բարձունքները, որոնք նվաճում է երիտասարդությունը կրթական ու գիտական, աշխատանքային ու հասարակական-քաղաքական ոլորտներում եւ, իհարկե, զինվորական ծառայության ընթացքում ու մասնավորապես սահմանային առաջնագծում, չափազանց կարեւոր են մեր երկրի կյանքում: Այն սահմանները, որ պաշտպանում է երիտասարդությունն իր գործունեությամբ եւ հաճախ նաեւ կյանքով՝ պետական, արդարության, ժողովրդավարության սահմանները, կենսական են հասարակության ու պետության համար: Այս բոլոր ճակատներում եւ գործընթացներում մեր երիտասարդները պատվախնդիր են՝ արժանապատվության ու պարտքի հստակ գիտակցումով:

Համոզված եմ, որ այսպիսի երիտասարդությամբ մեզ սպասում է հենց այն ապագան, որը մեր նպատակակետն է որպես հայրենիքի արժեքն իմացող քաղաքացի, որպես խաղաղ զարգացման ճանապարհն ընտրած պետություն, որպես հաստատակամ ու հաղթող ժողովուրդ:

Եւս մեկ անգամ շնորհավորելով Ուսանողների եւ երիտասարդների օրվա առթիվ՝ մաղթում եմ ձեզ, սիրելի երիտասարդներ եւ ուսանողներ, լավատեսություն, բարեկեցություն, վստահություն սեփական ուժերի հանդեպ եւ շարունակական հաղթանակներ»:

ՀՀ ԱԺ հասարակայնության եւ տեղեկատվության միջոցների հետ կապերի վարչություն