ԵՊՀ պատմության ֆակուլտետի դեկան, պատմաբան Էդիկ Մինասյանն այսօր «Նոյյան տապան» լրատվական գործակալությունում կրկին անդրադարձավ մեղադրանքներին, թե տարիներ առաջ իր հեղինակած պատմության դասագրքում Մարտի 1-ի դեպքերը ներկայացվել են սուբյեկտիվ տեսանկյունից եւ փաստերի խեղաթյուրմամբ:
Էդիկ Մինասյանի խոսքով՝ «կիսատ-պռատ» տեղեկությունների հիման վրա են իրեն քննադատում՝ մոռանալով, որ պատմական դեպքերն իրենց զարգացման մեջ պետք է դիտարկել: «Եղած փաստաթղթերի եւ փաստերի հիման վրա պատմություն շարադրել՝ չի նշանակում պատմություն կեղծել»,-համոզմունք հայտնեց նա:
Մինասյանը պնդեց, որ Մարտի 1-ի դեպքերը միակողմանի չի ներկայացրել. «Գրքում գրված է, որ երկու կողմն էլ մեղավոր են եղել, միակողմանի գնահատականներ չկան այդ գրքում…չգիտես ինչու, սա հաշվի չեն առնում ու փնովում են: Չեմ ուզում զոհերի հետ կապված շատ խորանամ…պատմությունը զարգացման մեջ պետք է գնահատել: Իրականությունն է գրված՝ օբյեկտիվորեն, եւ երկկողմանի գնահատական է տրված: Շարադրված է, որ տասը զոհ կա: Իսկ պատմական փաստերն օդից չեն վերցվել, մինչդեռ որոշ մարդիկ ուզում են անընդհատ իշխանություններին փնովել: Դուրս է գալիս, որ մյուս կողմն ընդհանրապես մեղավոր չի՞, իշխանությո՞ւնն է միայն մեղավոր: Ախր դա էլ է սխալ»:
Հեղինակի խոսքով՝ գրքում գրված է, թե իշխանությունները որ հանգամանքներում են մեղավոր. «Շարադրված է նաեւ ընդդիմության մեղավորության մասին: Մինչեւ վերջ կարդացեք»:
Ապա Մինասյանը նշեց, որ դասագրքի վերահրատարակված տարբերակում միայն փաստերն են՝ առանց եզրակացությունների. «Գուցե հետագայում նոր փաստեր ի հայտ գան»:
Լուիզա ՍՈՒՔԻԱՍՅԱՆ
