Մինչ Երեւանում «Ելքը» պայքարում է Միկոյանի անվան փողոցը անվանափոխել հայ բարերար Քըրք Քըրքորյանի անվամբ, ոչ բարի համբավ ունեցող կոմունիստ Անաստաս Միկոյանը «սուսիկ-փուսիկ» հանգրվանել է հոգեւոր քաղաքում՝ Մայր Աթոռ Սուրբ Էջմիածնի այգում: Այստեղ է «տնավորվել» մեկ այլ կոմունիստ էլ՝ Ստեփան Շահումյանը, որին «Ելքն», այսպես ասած, դեռ չի հասել:
Եկեղեցու այգում է տեղադրված նաեւ Ամենայն Հայոց կաթողիկոս Վազգեն 1-ի արձանը. հասկանալի է: Սակայն դժվար է հասկանալ, թե ինչո՞ւ են այս 2 ոչ այնքան հայանպաստ կոմունիստների մեծադիր կիսանդրիները տեղադրվել Սուրբ Էջմիածնի այգում, եւ ո՞րն է նրանց ու Մայր Աթոռի հոգեւոր կապը: Ուշագրավ է, որ նրանց կիսանդրիները Մայր Աթոռի այգում տեղադրվել են դեռեւս խորհրդային տարիներին, եւ մինչ այսօր հոգեւոր հայրերը կարծես թե վառ են պահում Միկոյանի եւ Շահումյանի հիշատակները, համենայնդեպս՝ այգում զբոսնողների համար:
Լուսանկարը՝ Նելլի Բաբայանի
«Առավոտ» օրաթերթ
26.09.2017
