«Ծառուկյան» խմբակցության պատգամավոր Տատյանա Միքայելյանն այսօր ռուսերեն դասագրքերի հարցով դիմեց ԿԳ նախարարին: Հիշեցնենք, որ երեկ ԱԺ հայտարարությունների ժամին նա դիմել էր ՌԴ դեսպանին՝ ասելով, որ հայ-ռուսական բարձր հարաբերություններին հարիր չէ, որ ռուսաց լեզվով ուսուցումը նորմալ չի կատարվում, անգամ ռուսական սեկտորի կործանման մտահոգություն էր հայտնել: Միքայելյանը մասնավորապես դժգոհում էր ռուսերեն լեզվով մաթեմատիկայի, ֆիզիկայի, աշխարհագրության դասագրքերից: Ըստ նրա, դասագրքեր չկան, եղածներն էլ հին են, աշխարհագրության դասագիրքը 1989 թվականի է:
Միքայելյանն ասաց, որ ՌԴ դեսպանատունն է նախկինում գրքեր նվիրել մեր դպրոցներին, բայց ճիշտ չի անընդհատ իրենցից օգնության սպասելը:
ԿԳ նախարար Լեւոն Մկրտչյանը պատասխանեց, որ ՌԴ-ի միջոցներով են աջակցում այդ դպրոցներին, որովհետեւ իրենք դասավանդում են իրենց ծրագրերով, նման ծրագրերը ենթադրում են աջակցություն:
Նախարարն ասաց, որ խորացված ռուսերենով դպրոցները 67-ն են, այնտեղ դասագրքերի եւ ուսումնական ծրագրերի արմատական վերանայում է եղել 2014-ին: Նախարարն ասաց, որ այն, ինչ անվանում են խորացված ռուսերենով ուսուցում, հատուկ ծրագիր չեն անցնում, դասաժամերն են պարզապես ավելի եւ ուսուցիչները հատուկ վերապատրաստում էլ չեն անցնում:
Լեւոն Մկրտչյանն ասաց, որ խորացված լեզուներով դպրոցների համակարգ պետք է ունենան եւ յուրաքանչյուր մարզում ունենալու են լեզուների խորացված ուսուցման կենտրոններ:
Հռիփսիմե ՋԵԲԵՋՅԱՆ
