ՀԱՅՏԱՐԱՐՈՒԹՅՈՒՆ
Անկախացումից հետո երկրի իշխանությունները չփորձեցին հաշվի առնել հանրության կարծիքը, վերլուծել իրողությունների հետևանքները և ձեռնարկել միջոցներ, որպեսզի սոցիալական, տնտեսական, բարոյական ճգնաժամ չլինի երկրում: Վերջին շաբաթներին հանրությունը զարթոնք է ապրում և փորձում է մերժել ոչ միայն անհատի` ի դեմս Սերժ Սարգսյանի, այլ քայլ է կատարում մերժել իշխանական բուրգի շուրջ հավաքվածներին:
Այս օրերին առավել դերակատարում ունեցավ բուհերի ուսանողությունը, որոնց խաղաղ անհնազանդությունը և ընդվզումը ապշեցրեց ամբողջ աշխարհին:
Արդեն մի քանի ամիս է լուրջ խմորումներ կան Շիրակի պետական համալսարանում` ռեկտոր, ՀՀԿ-ի մարզային կառույցի ղեկավար Սահակ Մինասյանի վարած քաղաքականության շուրջ:
Գյումրեցիները առանձնապես ոգևորված ընդունեցին Սերժ Սարգսյանի հրաժարականը և անընդունելի են համարում ՀՀԿ-ի հետագա իշխանությունը երկրում:
Հանրապետության երկրորդ քաղաքում` Գյումրիում Շիրակի պետական համալսարանը ոչ միայն կրթօջախ է, այլ այդ քաղաքի շարժիչ ուժն է` իր մտավորականներով և ուսանողությամբ: Բնական է, որ հանրապետությունում ստեղծված իրավիճակում ՀՀԿ-ի մարզային կառույցի ղեկավար Սահակ Մինասյանի կողմից բուհի հետագա կառավարումը կլինի անարդյունավետ, ինչ-որ տեղ փակուղային:
Կարծում եմ, ի շահ Շիրակի պետական համալսարանի աշխատողների և ուսանողների Սահակ Մինասյանը ճիշտ կանի հրաժարական տա. այն կնպաստի, որպեսզի Գյումրիում անդորրը պահպանվի:
Հայաստանի բուհերի արհեստակցական կազմակերպությունների ճյուղային հանրապետական միության նախագահ
Գառնիկ ՎԱՂԱՐՇԱԿՅԱՆ
