«Բա հացադուլավորներին որ թույլ էին տալիս ուտելիք, խմելիք տալ, բարձ տալ, օգտվել սանհանգույցներից, դա ինքն իրե՞ն էր արվում». Արամ Սիմոնյանը շփոթվեց

Ինչպես տեղեկացրել ենք՝  «ԵՊՀ տոտալ ռեստարտ» նախաձեռնության անդամներն ու դասադուլին միացած ուսանողները հանդիպում են ԵՊՀ ռեկտոր Արամ Սիմոնյանի հետ:

Առաջին փոխվարչապետ Արարատ Միրզոյանի գրասենյակի ղեկավար Վահան Կոստանյանը մեջբերեց պարոն Սիմոնյանի այն խոսքերը, թե չի տիրապետում իրավիճակին: Արամ Սիմոնյանն արձագանքելով՝ ասաց. «Խնդրում եմ բառերը ճիշտ օգտագործել: Ես նման բան եմ ասել, բայց ասել եմ, որ տվյալ դեպքի վերաբերյալ չեմ տիրապետում իրավիճակին»:

Վահան Կոստանյանը հիշեցրեց, երբ մարդիկ հացադուլի էին նստած՝ «Դուք որևէ անգամ չփորձեցիք գնալ իրենց մոտ ու հասկանալ, թե ինչ է կատարվում: Իսկ այսօր հանկարծ որոշեցիք ընդունել ուսանողներին՝ չգիտես ինչու»: Մեկ այլ ուսանող հավելեց՝ դասադուլի ժամանակ ասացիք՝ կհոգնեն, կգնան: Արամ Սիմոնյանն արձագանքեց. «Բա հացադուլավորներին, որ թույլ էին տալիս ուտելիք, խմելիք տալ, բարձ տալ, օգտվել սանհանգույցներից, դա ինքն իրե՞ն էր արվում»: Ուսանողները դժգոհեցին՝ ի՞նչ ուտելիք և պահանջեցին ներողություն:

Պարոն Սիմոնյանն ասաց, թե այդ հարցում ինքը սխալվել է՝ ուտելիք չպետք է ասեր: «ԵՊՀ տոտալ ռեստարտ» նախաձեռնության անդամ Դավիթ Պետրոսյանը հայտարարեց՝ թուղթ կա, որ հացադուլի ժամանակ իրենց ստամոքսը եղել է դատարկ:

Վահան Կոստանյանը հայտարարեց՝ հենց նոր դուք ասացիք, որ դուք դիկտատ եք հաստատել համալսարանում՝ կուզեմ կխմեն, չուզեմ, չեն խմի: Արամ Սիմոնյանը պարզաբանեց. «Իմ ասածն ուրիշ է, որ եթե ես արգելք հանդիսանայի, կդիմեի միջոցառումների: Եթե դիկտատ լինեի, այդպես կանեի, եթե չեմ արել, ուրեմն դիկտատ չկար»:

Մի ուսանող էլ հիշեցրեց, թե երբ հացադուլ էին անում, ռեկտորն ասել էր՝ կսովորեն, դուրս կգան ու վերաբերմունքը ցույց տվեցիք մեր նկատմամբ, հիմա որպես ԵՊՀ ռեկտոր ու ուսանողների առաջ պատասխանատու անձ և տղամարդավարի ձևով ակնկալում եմ պատասխան նմանատիպ վերաբերմունքի համար: Ռեկտորը պատասխանեց. «Ինչ վերաբերում է սովածությանը, չեմ հիշում, որ նման բան ասել եմ, հնարավոր է: Դրա մեջ որևէ կրիմինալ չեմ տեսնում»:

Ուսանողներից մեկը կոնկրետ պահանջներ բարձրացրեց՝ ռեկտորի հրաժարական, հոգաբարձուների խորհրդի հրաժարական: Արամ Սիմոնյանը պատասխանեց, թե այս բոլոր պահանջները իրավաչափ չեն. «Ռեկտորի հրաժարականը կարող է լինել միայն երկու դեպքում, երբ նա դիմում է տալիս և երբ հոգաբարձուների խորհուրդը, որ ընտրել է ռեկտորին, հետ է կանչում նրան կամ քվեարկում է, որպեսզի լքի պաշտոնը: Երկու դեպքն էլ իրավական հողի վրա է: Ես օրինականության կողմնակից եմ և գտնում եմ, որ ամեն ինչ պետք է արվի օրենքով: Ինչ վերաբերում է հոգաբարձուների խորհրդին, ես չեմ ընտրել այն, ընտրվել է կառավարության որոշմամբ: Հասցեատերը կառավարությունն է, ես չեմ: Ինքս հոգաբարձուների խորհրդի անդամ չեմ, և որևէ ուժ չունի իմ կարծիքը հոգաբարձուների խորհրդի հետ կապված»:

Դառնալով աուդիտի անցկացման հետ կապված պահանջին՝ պարոն Սիմոնյանը պարզաբանեց. «Ըստ օրենքի՝ աուդիտ կազմակերպվում է հիմնադրամի համար, նրա հոգաբարձուների խորհրդի որոշմամբ՝ տարին մեկ անգամ: 2017-ին աուդիտն անցկացվել է բուհում պետության կողմից լիցենզիա ստացած համապատասխան աուդիտորական կազմակերպության կողմից: Այն պարտադիր կերպով անցկացվելու է հոգաբարձուների խորհրդի որոշմամբ՝ ոչ ռեկտորի ցանկությամբ, ֆինանսական տարվա ավարտին»:

Տաթև ՀԱՐՈՒԹՅՈՒՆՅԱՆ