Այս տարի լրանում է Տորոնտոյի Ս. երրորդություն հայ առաքելական եկեղեցու 90 ամյակը: Այդ առիթով եկեղեցու հովանու ներքո գործող Բարև մշակութային կենտրոնը կազմակերպել է լուսանկարիչ Զավեն Խաչիկյանի «Կարս էն Քարշ» խորագրի ներքո ընթացող անհանտական ցուցահանդեսը, որի բացումը տեղի է ունեցել նոյեմբերի 25-ին՝ եկեղեցու «Մարալ Իշխանեան» սրահում: Զավեն Խաչիկյանը Երևանից Տորոնտո էր մեկնել ներկա գտնվելու իր աշխատանքների ցուցահանդեսին:
Պատմական հայրենիքի, արցախյան շարժման, Հայաստանի բնապատկերների, ինչպես նաև հայտնի ու անհայտ մարդկանց դիմանկարները մեծ հետաքրքրություն առաջացրին ցուցահանդեսի բացմանը ներկա գտնվողների մոտ: Տարեց ու երիտասարդ մարդիկ զննում, հիանում էին լուսանկարներով, հարցեր ուղղում լուսանկարչին, հիշողության գիրկն ընկնում՝ նորից վերապրելով իրենց հայրենիքի հանդեպ կարոտն ու սերը:
Ցուցահանդեսի բացմանը հատուկ խոսքով է հանդես եկել Տորոնտոյի Կանադայայոց թեմի փոխառաջնորդ, Ս. երրորդություն հայառաքելական եկեղեցու հոգևոր հովիվ տեր Զարեհ Ավագ քահանա Զարգարյանը: Ցուցահանդեսի բացմանը ներկա է եղել նաև դերասան Վարդան Պետրոսյանը:
Նույն օրը արվեստասերները հնարավորություն են ունեցել զրույց-քննարկում ունենալ լուսանկարիչ Զավեն Խաչիկյանի հետ: Զրույցը վարել է լրագրող Մերի Մուսինյանը:
«Կարս էն Քարշ» ցուցահանդեսը կգործի մինչև դեկտեմբերի 2-ը:
Զավեն Խաչիկյանի լուսանկարները հայտնվել են Բրիտանական գրադարանի, “Paris-Musées”-ի, Ինդիանա համալսարանի մամուլի և շատ այլ հրատարակչությունների հրատարակած մեկ տասնյակից ավելի գրքերում: Խաչիկյանն իր թեմատիկ աշխատանքների ցուցահանդեսներ է կազմակերպել ԱՄՆ-ում, Եվրոպայում, Ռուսաստանում և Հայաստանում:
Ստացած մրցանակների թվում են «Տարվա լավագույն ֆոտոլրագրող» և ՀՀ Նախագահի մրցանակը:
Տորոնտոյի Բարեւ կենտրոն
