Ազատ ոճի ըմբշամարտի Հայաստանի ազգային եւ երիտասարդական հավաքականները հունվարի 7-ից ընդհանուր ֆիզպատրաստության համատեղ ուսումնամարզական հավաք են անցկացնում Ծաղկաձորում:
Ազգային հավաքականի գլխավոր մարզիչ Հաբեթնակ Կուրղինյանը (նկարում) Aravot.am-ի հետ զրույցում ասաց, որ հրավիրել է Հայաստանի առաջնության հաղթողներին ու մրցանակակիրներին, ինչպես նաեւ իրենց լավագույն կողմերով դրսեւորած, սակայն մեդալի չարժանացած եւս մի քանի ըմբիշի: «Հավաքին չեն մասնակցում Վալոդյա Ֆրանգուլյանը, որը դեռ շարունակում է ապաքինել ուսի վնասվածքը, ինչպես նաեւ Գեորգի Կետոեւն ու Լեւան Բերիանիձեն, որոնք մոտ օրերս Հնդկաստանի իրենց ակումբներում մասնակցելու են այդ երկրի ակումբային առաջնությանը»,-հավելեց մարզիչը:
Հավաքականը Ծաղկաձորում կմնա մինչեւ հունվարի 20-ը, որից հետո հավաքը կշարունակի «Օլիմպավանում», իսկ առաջին պաշտոնական մեկնարկը կլինի Իրանում, փետրվարի 6-ին՝ «Թախտիի գավաթում»:
Իսկ երիտասարդական հավաքականի ավագ մարզիչ Ավետիք Վարդանյանը տեղեկացրեց, որ իրենց պաշտոնական առաջին մրցաշարը լինելու է փետրվարի 23-24-ին կայանալիք Հայաստանի առաջնությունը:
Աշոտ ՀԱԿՈԲՅԱՆ
