Կրթության փորձագետ Անահիտ Բախշյանը Aravot.am-ի հետ զրույցում խոսելով բուհերի կառավարման խորհուրդների կուսակցականացված լինելու մասին, ասաց. «Բուհերի կառավարման խորհուրդների կարգի մասին «Բարձրագույն կրթության մասին» օրենքի նոր նախագիծը բոլորովին այլ տրամաբանություն է պահանջում: Բուհերի կառավարման խորհուրդներում պետք է լինեն մարդիկ եւ ներսից, եւ գործարար շրջանակներից, եւ որեւէ կուսակցական պաշտոնյա այնտեղ չի նախատեսվելու: Բայց քանի որ այդ օրենքը դեռ չեն ընդունել, ոչինչ չի փոխվում նախորդ իշխանության արած քայլերից:
Բոլոր բուհերի կառավարման խորհուրդները նայել եմ, եւ ամեն տեղ Քաղաքացիական պայմանագիր կուսակցության ներկայացուցիչներ են, պաշտոնյաներ, պատգամավորներ, վարչապետի խորհրդականներ ու օգնականներ: Իսկ դա միանշանակ կարելի է դիտարկել իբրեւ կուսակցականացվածություն»:
Տիկին Բախշյանը հավելեց. «Շարունակելու եմ պնդել, որ այն ընդդիմությունը, որը կար մեկ տարի առաջ եւ իրավացիորեն քննադատում էր նախորդ իշխանությունների ձեւավորած քաղաքականացված եւ կուսակցականացված կառավարման խորհուրդները, այսօր շարունակվում է` ի դեմս Քաղաքացիական պայմանագրի, ինչը շատ վատ է»:
Հիշեցնենք, որ ԿԳ նախարար Արայիկ Հարությունյանը հայտարարել էր, որ կրթական հաստատություններում պետք է լինի զրո քաղաքականացվածություն:
Գոհար ՀԱԿՈԲՅԱՆ
