Հապալասը թերեւս ամենաթանկ հատապտուղներից է, սակայն նաեւ՝ ամենահամեղ ու օգտակարներից մեկը: Հայաստանի սուպերմարկետներում պարբերաբար ստանում են թարմ հապալաս, ընդ որում, գինը, կախված սուպերմարկետից, կարող է շատ տարբեր լինել: Իսկ սառեցված հապալաս կա մշտապես: Լավ առիթի դեպքում արժե մի քիչ թանկ, բայց շատ համեղ այս տորթը պատրաստել:
Անհրաժեշտ մթերքները
Խմորի համար
Կարագ- 200 գրամ
Կարդացեք նաև
Շաքարավազ- 1 բաժակ
Թթվասեր-1 բաժակ
Մածուն-1 բաժակ
Կիտրոն- 1 հատ
Ձու-6 հատ
Սոդա-1 թեյի գդալ
Վանիլի մզվածք – 1 ճաշի գդալ (կամ մեկ տուփ փոշի վանիլին)
Ալյուր-2 բաժակ
Սառեցված հապալաս- 1 բաժակ
Կրեմի համար
Կարագ-200 գրամ
Սերուցքային պանիր- 400 գրամ
սառեցված հապալաս-1 բաժակ
Շաքարավազ-1 բաժակ
Ռոմ կամ կոնյակ-2 ճաշի գդալ
Եգիպտացորենի կամ կարտոֆիլի օսլա- 2 ճաշի գդալ
Զարդարելու համար՝ թարմ հապալաս- 1 տուփ (սովորաբար տուփը պարունակում է 125 գրամ հապալաս)
Պատրաստման եղանակը
Կարագը հալեցնել: Ավելացնել շաքարավազը եւ լավ հարել, որ դառնա կրեմանման միատարր զանգված:
Ավելացնել ձուն, շարունակել հարել: Ավելացնել կիտրոնի քերած կեղեւը եւ ողջ հյութը, սառեցված հապալասը, վանիլը, թթվասերն ու մածունը: Կրկին հարել:
Այժմ ավելացնել չոր մթերքները՝ ալյուրն ու սոդան եւ հարել, պետք է դառնա միջին խտության բիսկվիթի խմոր: Լցրեք յուղաթղթով ծածկված խորը կլոր ամանի մեջ եւ դրեք նախապես 180 աստիճան տաքացված ջեռոցը մոտավորապես 35-40 րոպեով, պատրաստվածությունը ստուգեք փայտե չոփիկի միջոցով, եթե չոր դուրս եկավ խմորի միջից, ուրեմն՝ պատրաստ է, եթե խմորոտ լինի, թողեք մի քիչ էլ եփվի:
Մինչ խմորը եփվում է՝ պատրաստեք կրեմը:
Սառեցված հապալասը լցրեք փոքր կաթսայի կամ ջազվեի մեջ, ավելացրեք շաքարավազն ու ռոմը: Դրեք կրակին, անընդհատ խառնելով եփեք, մինչեւ շաքարավազն ամբողջությամբ հալվի, հապալասը փափկի: Ավելացրեք օսլան, շարունակեք մարմանդ կրակի վրա եփել՝ անընդհատ խառնելով, մոտավորապես 7-10 րոպե: Կրակից վերցրեք, անցկացրեք մետաղյա ցանցով, որպեսզի միատարր լինի եւ դրեք մի կողմ, թողեք ամբողջությամբ սառչի:
Սենյակային ջերմաստիճանի կարագը լավ հարեք, ավելացրեք սերուցքային պանիրը, շարունակեք հարել, քիչ-քիչ ավելացրեք հապալասի թանձրուկը: Կրեմը կդառնա մանուշակագույն նուրբ կրեմ:
Երբ խմորը պատրաստ լինի, հանեք, թողեք սառչի, որից հետո մեջտեղից կիսեք: Շերտերի արանքը քսեք կրեմը, ապա ողջ տորթը նույնպես կրեմապատեք: Զարդարեք թարմ հապալասներով: Դրեք 1-2 ժամով սառնարան եւ մատուցեք:
Այս լուսանկարում ես տորթը զարդարել եմ նաեւ փշրված վարդագույն բեզեի կտորներով: Եթե դուք էլ որոշեք բեզեով զարդարել, ապա դա արեք մատուցելուց անմիջապես առաջ, քանի որ բեզեն հալվում է՝ կրեմի խոնավության ազդեցությունից:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
Հապալասը մեզ մօտ էլ է թանկ ու դա երբեմն ինձ բարկացնում է 🙂 Բայց շատ առողջարար ու համով հատապտուղ է:
Մի քիչ թեմայից շեղուեմ. եթէ ուզում էք հապալաս ուտէք, մեր Հայաստանում ամռանը եւ աշնանը վայրի հապալաս շատ կայ:
Օրինակ՝ յստակ տեղ ասեմ: Շամշադինի Միափորի (Մրղուզի) լեռներում լիի՜քը՝ կիլոներով կարող էք ուտել: Քայլելիս նոյնիսկ ոտի տակ է ընկնում:
Ամռանը ընկերներով հաւաքւում էք, աւտոյի ճամփի ծախսը կիսում, առաւօտ շուտ գնում էք, գիշերը վերադառնում: Գիշերակաց չկայ: Սնունդ չէք տանում, այլ ուտում էք մեր Տաւուշի անարատ կաթ ու մածունը, միսը, խմում էք մեր աստուածային օղիներն ու ջուրը, վայելում սարերը, ձորերն ու անտառները 🙂
Մեր Հայաստանն արշաւի համար էնքա՜ն սիրուն տեղեր ունի, որ դրանից չօգտուելը մեղք է: Ու ամենակարեւորը՝ շատ փող պէտք չի: