Այսօր Սյունիքի մարզի Տորունիք գյուղի դիմացի այգիներում մահացած հայտնաբերված հովիվները Aravot.am-ի տեղեկություններով մահից առաջ վիճել են: Հովիվներից 51-ամյա Սամվել Ղ.-ի գլխին քարով հարվածել է հովիվներից երիտասարդը՝ 27-ամյա Նելսոն Ա.-ն:
Քարով գլխին հարված ստանալուց հետո 51-ամյա հովիվը մահացել է, ինչից հետո հարվածողը՝ 27-ամյա Նելսոն Ա.-ն ինքնասպանություն է գործել: Մեր տեղեկություններով Նելսոն Ա․-ն հոգեկան խանգարում է ունեցել։ Քանի որ երկուսն էլ մահացել են, իրավապահներին դեռ չի հաջողվել պարզել՝ ինչ հարցերի շուրջ են հովիվները վիճել:
Ոստիկաններն ու քննիչները պարզել են, որ նույն օրը, ժամը 15:30-ի սահմաններում Տորունիք գյուղի բնակիչ, 27-ամյա Սամսոն Ղ.-ն իրենց գյուղից դեպի Դաստակերտ տանող ավտոճանապարհի ձախակողմյան հատվածից 1.5 կմ հեռավորությամբ գտնվող արոտավայրում հայտնաբերել է գլխի գագաթային շրջանի ջնջխված վերքով իր հոր՝ 51-ամյա Սամվել Ղ.-ի դին, ում պարանոցի ծոծրակային հատվածում առկա է եղել 30-20 սմ չափերի արնանման հետքերով քար: Հոր դիակից 1 մետր հեռավորության վրա Սամսոն Ղ.-ն հայտնաբերել է համագյուղացի, 27-ամյա Նելսոն Ա.-ի դին՝ կզակի շրջանի հրազենային վնասվածքով:
Արփինե ՍԻՄՈՆՅԱՆ
