Ռուսաստանում հայտնի հրապարակախոս, լրագրող Վիտալի Դիմարսկին, որը հրավիրվել էր վարելու «Ռոսատոմ» պետական ընկերության կազմակերպած «Էներգիայի մարդիկ 2019» փառատոնի շրջանակներում «Քայլ դեպի թվային ապագան» թոք-շոուն, հետաքրքրվեց` երբ միջուկային էներգետիկայի ոլորտի մարդիկ նորանոր ծրագրեր են կազմում, արդյոք իրենց գլխում ունե՞ն Չեռնոբիլը։
Նա հիշեց, երբ տարիներ առաջ մի առիթով, որպես լրագրող նյութ էր պատրաստել ատոմակայանի մասին, որի պատասխանատուները վստահեցրել էին, թե միջուկային վառելիքը միանգամայն անվտանգ ու զարգացող ոլորտ է, անվտանգությունն էլ` երաշխավորված, օրեր անց Չեռնոբիլի ատոմակայանի վթարն է տեղի ունեցել։ Այդ օրվանից ի վեր, ինչպես Վիտալի Դիմարսկին ասաց, այդ հարցն իր մեջ միշտ առաջանում է։
Մանրամասները` տեսանյութում
Հրապարակախոս Դիմարսկու հարցին պատասխանեց «Ռոսէներգոատոմ»-ի ֆինանսական տնօրեն Սերգեյ Միգալինը։ Նա ասաց, որ իրենց գլխում մշտապես անվտանգության եվ պատասխանատվության միտքն է, բայց ոչ Չեռնոբիլի, քանի որ այդ միջադեպից մի ամբողջ դարաշրջան է անցել եվ դրանից հետո այնպիսի միջոցառումներ ու տեխնիկական լուծումներ են ձեռնարկվել` ռեակտորների անվտանգությունը բարձրացնելու համար, որ մարդու գործոնը նվազագույնի է հասցվել։
Սերգեյ Միգալինի խոսքով, իրենց համար առաջին հերթին մարդու անվտանգությունն է կարեւոր, որն աշխատում է ատոմակայանում։
Մանրամասները` տեսանյութում
Թոք-շոուն վարելու էր հրավիրված նաեւ հայտնի հեռուստահաղորդավար, դերասան, շոումեն Վլադիմիր Մարկոնին։ Նա էլ կես կատակ, կես լուրջ հարցրեց` եթե ամեն ինչ թվայնացվում է, մարդկանց փոխարինելու են գալիս տեխնոլոգիաները, ովքե՞ր են հաճախելու ատոմակայանի աշխատակիցների համար դեռեւս խորհրդային ժամանակներից նախատեսված առողջարանները։ Սերգեյ Միգալինն ի պատասխան ասաց, որ տեխնոլոգիաներով փոխարինելու նպատակը մարդկանց հոգսը բեռնաթափելն է. «Մարդն ավելի շատ կարող է զբաղվել գիտությամբ, ստեղծագործական աշխատանքով, մարդն ավելի շատ հնարավորություն կունենա մտածելու, շփվելու, հետեւաբար, մենք խնդիր չենք դրել մարդուն փոխարինելու»։
Փառատոնն անց է կացվում Սանկտ Պետերբուրգի Զելենագորսկ ավանում` հոկտեմբերի 8-ից 12-ը։ Այդ օրերին Հայաստանի եւ այլ երկրների ԶԼՄ ներկայացուցիչները, բլոգերներն ու մամուլի ծառայությունների աշխատակիցները այցելում են Լենինգրադի ատոմակայան շրջայցի, մասնակցում շրջակա միջավայրն անվտանգ դարձնելու թեմայով քննարկումների։
Լուսինե ԲՈւԴԱՂՅԱՆ
Սանկտ Պետերբուրգ