«Ես կողմ եմ, որ Ռոբերտ Քոչարյանի խափանման միջոցը փոխվի: ՀՀ երկրորդ նախագահ Ռոբերտ Քոչարյանն անհավասար պայմաններում է»,- Երևանի ընդհանուր իրավասության դատարանում (նախագահող դատավոր Աննա Դանիբեկյան) նոյեմբերի 5-ին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին հայտարարեց ՀՀ պաշտպանության նախկին նախարար Սեյրան Օհանյանը:
Նա նշեց, որ հարգանք տածելով այն մարդկանց նկատմամբ, որոնք իրենց հարազատներին կորցրել են, այս հոդվածի քննարկումը կապ չունի որևէ տուժողի հետ. «Եթե խոսում ենք մարտի 1-ի իրադարձությունների մասին, ապա այն հենված է ՀՀ երեք նախագահների գործունեության վրա: Մեկ նախագահը ընտրվել էր, մյուսը չէր ընդունում, մյուսը պետք է կարգուկանոն հաստատեր հանրապետությունում և այդ ամենը փոխանցեր հաջորդ ընտրված նախագահին: Հարգանք տածելով մյուս նախագահների նկատմամբ՝ նշեմ, որ Ռոբերտ Քոչարյանն անհավասար պայմաններում է գտնվում՝ մանավանդ հաշվի առնելով հանրապետությունում ստեղծված այն տեղեկատվական մեծ իրադրությունը, որ կարծես բոլորը կողքից նայում են ու հրճվում, թե ինչպիսի պայմաններում է գտնվում ՀՀ երկրորդ նախագահը»:
Սեյրան Օհանյանը հայտարարեց, թե ճանաչելով Ռոբերտ Քոչարյանին վստահ է, որ նրա տված ոչ մի խոստում օդում չի մնա:
Դատական նիստի ավարտից հետո լրագրողները Սեյրան Օհանյանից հետաքրքրվեցին՝ ի՞նչ կասի այն մասին, որ փամփուշտներ են փոխվել, զորքի հագուստն է փոխվել, Սեյրան Օհանյանն ասաց, որ աշխատում է նախաքննական մարմնի աշխատանքների մեջ չմտնել և չխանգարել. «Իմ գործունեության ընթացքում ես միշտ եղել եմ զորքի հետ և առաջին գծում: Ով փոխել է փամփուշտները, նրանց հարցրեք»:
Կարդացեք նաև
Այն, որ ըստ մեղադրանքի՝ Արցախից բերված մեքենաների համարանիշներն են փոխվել, Սեյրան Օհանյանը դա համարեց նախաքննական գաղտնիքներ, որոնք հրապարակելը սխալ է:
Տաթև ՀԱՐՈՒԹՅՈՒՆՅԱՆ
