«Դա այն չէր, ինչ սպասում էինք, որովհետեւ թավշյա հեղափոխությունից հետո արդեն երկրորդ անգամ ԱԱԾ օրը նշվում է ՉԵԿԱ, ՆԿՎԴ, ԿԳԲ` այդ հաստատության հիմնադրման օրվա հետ միաժամանակ, նույն օրը: Այդ խորհրդանշական միասնությունը ամենեւին համատեղելի չէ ՀՀ-ի՝ որպես ժողովրդավարական, իրավական եւ ինքնիշխան պետություն հռչակված, թավշյա հեղափոխությունից հետո հատկապես ժողովրդավարական արժեքների վերականգնման պետության սկզբունքների ամրագրված մոտեցումներին:
Մեզ համար հասկանալի չէ, թե այդ «կարմիր գծեր» ասվածը ինչ է իրենից ներկայացնում, որովհետեւ գիտենք, որ կան հստակ չափանիշներ: Դրանք հաշվետվողականությունն ու թափանցիկությունն են ցանկացած պետական մարմնի: Ինքնիշխան ժողովրդավարական պետության պայմաններում պետական մարմնի նկատմամբ հանրային վստահության չափանիշով է որոշվում ցանկացած գիծ, այդ թվում «կարմիր» գիծ հասկացությունը»,-արձագանքելով վարչապետ Փաշինյանի այն հայտարարությանը, թե ԱԱԾ-ն երբեք չի անցել կարմիր գծերը, որոնք կարող են գոյություն ունենալ հանրային հարաբերություններում, ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ «Մեդիա կենտրոնում» կայացած «Հեղափոխությունը հասե՞լ է ԱԱԾ, թե՞ շրջանցել է այն. ՀԿ-ները մտահոգված են» թեմայով քննարկման ժամանակ։
Սաքունցի խոսքով, «Պետք է ոչ թե գնահատողական դատողություններով որակել պետական մարմնի գործունեությունը, այլ իրավական եւ ժողովրդավարական պետությանը համարժեք, նրան բնորոշ չափանիշներով: Թավշյա հեղափոխությունից հետո նաեւ վերջին մեկ ամսվա ընթացքում մի շարք կարեւոր իրադարձություններ տեղի ունեցան…Վարչապետը տիրապետում է որոշակի տեղեկատվության եւ գուցե իր ունեցած տեղեկատվության հիման վրա է դատողություններ անում: Մենք, սակայն, նույն տեղեկատվության հիման վրա չենք կարող մեր մոտեցումը եւ գնահատականները ձեւակերպել, ելնելով հանրային փաստերից»:
Նա օրինակներ բերեց. «Մինչ թավշյա հեղափոխությունը` բարձրաստիճան պաշտոնատար անձինք հանձինս նախկին գլխավոր դատախազի, զինվորական դատախազի, նախկին պաշտպանության նախարար, Գլխավոր շտաբի պետի, ԴԱՀԿ պետի, մի քանի օր առաջ էլ տեսանք Հոկտեմբերի 27-ի դատավոր Ուզունյանի ու դեռ էլի կլինեն պաշտոնյաներ, որոնք ի պաշտոնե կրում են պետական գաղտնիքներ, հայտնվում են այլ երկրում՝ իրենց հետ տանելով պետական գաղտնիքներ: Անվտանգության էությունը պետական գաղտնիքի պաշտպանությունն է, մինչդեռ պետական գաղտնիքը կրողները մեր երկրից դուրս եւ մեկ պետության տարածքում ու հովանավորության ներքո են գտնվում: Առավել մեծ մարտահրավերներ ԱԱԾ-ի առաջ,քան սա ես չեմ պատկերացնում»:
Կարդացեք նաև
Գոհար ՀԱԿՈԲՅԱՆ
Լուսանկարը՝ «Մեդիա» կենտրոնի
