«Իմ քայլը» խմբակցության փակ նիստից հետո այսօր լրագրողները խմբակցության պատգամավոր Հովհաննես Իգիթյանից հետաքրքրվեցին՝ կապ տեսնո՞ւմ է Արթուր Վանեցյան-Նիկոլ Փաշինյան հեռախոսազրույցի գաղտնալսման ու հրապարակման եւ այն տեղեկության միջեւ, որ ԱԱԾ նախկին պետ Արթուր Վանեցյանը մտադիր է եղել ՀՀ-ում պետական հեղաշրջում իրականացնել: Հիշեցնենք, որ ապօրինի գաղտնալսման գործով այսօր հարցաքննվել է վարչապետ Նիկոլ Փաշինյանը: Իգիթյանն արձագանքեց, որ իրավիճակին տեղյակ է այնքանով, որքանով մամուլն է գրում եւ վերլուծում:
Իսկ գաղտնալսումների հետ կապված նշեց. «Առնվազն խայտառակ բան էր, էլ չասեմ, որ անվտանգությանն է վերաբերում: Չգիտեմ, թե ով է արել: Ունեմ ենթադրություններ եւ վարկածներ: Միանշանակ կարող եմ ասել, թե ով է դա օգտագործել եւ ինչի համար, ով է հաջորդ օրը դա առնվազն հրապարակել, որ լրատվամիջոցներով, ում միջոցով: Նա, ով սպասում էր այդ գաղտնալսումներին եւ սկսեց դրանք օգտագործել թեկուց պաշտպանության կամ քաղաքական դիվիդենտ շահելու համար»:
Թե ում մասին է խոսքը, Հովհաննես Իգիթյանը նշեց. «Դուք գիտեք ով է օգտագործել, ով է խոսում նույնիսկ դատական գործընթացի ժամանակ այդ գաղտնալսումների մասին»: Հարցին՝ «Ռոբերտ Քոչարյանի՞ն նկատի ունեք», նա այսպես պատասխանեց. «Ինքը, իհարկե, նախկին հանրապետականները: Ցանկացած քաղաքական գործիչ՝ իշխանական կամ ոչ, պետք է առնվազն մտահոգված լինի, որ ՀՀ պաշտոնյաներին գաղտնալսում են, բայց մարդիկ կան, որ ուրախությամբ են դա ներկայացրել»:
Կարդացեք նաև
Լուիզա ՍՈՒՔԻԱՍՅԱՆ
