Այսօր ՀԱԹ Բ2 թաղամասում բացահայտված ինքնասպանությունը, ամենայն հավանականությամբ, տեղի է ունեցել գիշերը: Տղամարդը, որը ինքնասպանություն է գործել` իր հետ 9-րդ հարկից ցած նետելով նաեւ իր երկու՝ 8 եւ 5 տարեկան երեխաներին, վերջերս էր վերադարձել Ռուսաստանի Դաշնությունից: Այս մասին Aravot.am-ին պատմեցին հարեւանները:
Նրանց խոսքով, նա սպա էր, սակայն ներկա պահին չէր աշխատում, բնակվում էր կնոջ հետ: Կինը նույնպես տանն է եղել, եւ ըստ հարեւանների, ամենայն հավանականությամբ քնած է եղել: Aravot.am-ի հարցին, թե հարեւանները որեւէ աղմուկ չե՞ն լսել, ի վերջո, երկու երեխաներին իր հետ վայր գցելով՝ հնարավոր չէր որեւէ աղմուկ չլսվեր, մեր զրուցակիցն ասաց, որ չեն լսել:
Ինքնասպան եղած տղամարդուն հարեւանները բնութագրում են հանգիստ հոգեվիճակ ունեցող անձնավորություն, որը մշտապես երեխաների հետ զբաղվում էր, բակում խաղում: Վերջերս էլ հարեւանները նրան տեսել են բակում, երեխաների հետ խաղալիս:
Մահացած հորը եւ երեխաներին առաջինը հայտնաբերել է շենքի հարակից հացի արտադրամասում աշխատող մի կին: Նա, մեզ հետ զրույցում պատմեց, որ առավոտյան, աշխատանքի գալիս, տեսել է բերանքսիվայր ընկած տղա երեխային եւ դեմքով գետնին ընկած աղջկան եւ ձեռք ու ոտքն ամբողջովին ջարդուփշուր եղած տղամարդուն: Կինը տեսել է նաեւ, ինչպես են շները հարձակված եղել աղջիկ երեխայի վրա:
Հիշեցնենք, որ այսօր առավոտյան, ժամը 08:06-ին Ճգնաժամային կառավարման ազգային կենտրոն ահազանգ է ստացվել, որ Երեւանի ՀԱԹ Բ2 թաղամասի թիվ 91 շենքի բնակարաններից մեկի բնակիչը 9-րդ հարկից ցած է նետել երեխային, այնուհետեւ ինքը ցած նետվել մյուս երեխայի հետ:
Կարդացեք նաև
Արփինե ՍԻՄՈՆՅԱՆ
