ՀՀ առողջապահության նախարարի տեղակալ Արտյոմ Սմբատյանը հայտնել է, որ զորահավաքի ենթակա անձի մոտ կորոնավիրուսային հիվանդության դրական պատասխանի դեպքում մեծ հավանականությամբ թեստը վերստուգվելու է։ Ըստ փոխնախարարի, վերստուգվելու է թե՛ անձի նմուշին համապատասխանությունը եւ թե՛ նմուշի ՊՇՌ թեստավորման պատասխանի իսկությունը:
Aravot.am–ը խնդրեց մանրամասնել փոխնախարարի հայտարարությունը: Առողջապահության նախարարի մամուլի քարտուղար Ալինա Նիկողոսյանից հետաքրքրվեցինք՝ քանի՞ նման դեպք է արձանագրվել, արդյոք շա՞տ են նման դեպքերը, որ նման որոշում է կայացվել: Ի պատասխան Ալինա Նիկողոսյանն ասաց՝ եթե նման դեպքեր եղել են, ապա դրանք իրավապահների տիրույթում են, եւ Արտյոմ Սմբատյանը այդ մասին խոսել է ԱԱԾ-ի հետ աշխատանքային քննարկման ժամանակ ու այդպիսի հորդոր հնչեցրել:
Հիշեցնենք, որ հոկտեմբերի 24-ին Ազգային անվտանգության ծառայությունը հաղորդագրություն տարածեց՝ նշելով, որ ԱԱԾ-ի կողմից ձեռնարկված օպերատիվ-հետախուզական համալիր եւ արդյունավետ միջոցառումների արդյունքում ձեռք են բերվել առերեւույթ փաստական տվյալներ այն մասին, որ զորահավաքային զինծառայող Ա. Ս.-ի հայրը` Ն.Ս.-ն, համոզելու կամ այլ եղանակով դրդել է առեւտրային կազմակերպության ծառայողներ հանդիսացող, բժշկական կենտրոնի լաբորատորիայի վարիչին եւ նույն լաբորատորիայի լաբորանտին, որպեսզի վերջիններս իրենց լիազորություններն օգտագործեն կազմակերպության շահերին հակառակ եւ զորահավաքային զինծառայողի օգտին տրամադրեն հետազոտության կեղծ արդյունք՝ իբր տվյալ անձի մոտ հայտնաբերվել է COVID-19 հիվանդություն, ինչը հնարավորություն է տվել զորահավաքային զինծառայողին ռազմական դրության պայմաններում ապօրինի ժամանակավորապես դադարեցնելու զինվորական ծառայության կամ դրա առանձին պարտականությունների կատարումը:
«Այդպիսի դեպքերը կանխելու հետեւանքով տեղի է ունեցել խորհրդակցություն առողջապահության նախարարության աշխատակիցների հետ՝ փոխնախարարի մասնակցությամբ, որից հետո էլ կհետեւեն գործողությունները»,-Aravot.am-ի հետ զրույցում ասաց ԱԱԾ մամուլի կենտրոնի ղեկավար Արթուր Գեւորգյանը:
Կարդացեք նաև
Թե քանի՞ նման դեպք է հայտնաբերվել, արդյո՞ք կեղծ թեստերի դեպքերը զանգվածային բնույթ են կրում, պարոն Գեւորգյանը պատասխանեց, որ անգամ մեկ դեպքը ԱԱԾ-ի ուշադրության կենտրոնում է, հետեւում են եւ փորձելու են հետայսու էլ կանխել նման դեպքերը:
Լուսինե ԲՈՒԴԱՂՅԱՆ
