Այսօր Ազատության հրապարակում Նիկոլ Փաշինյանի հրաժարականի պահանջով կազմակերպված ցույցից հետո քաղաքացիները երթով շարժվեցին դեպի ԱԺ շենք, այնուհետեւ՝ կառավարական առանձնատներ, որտեղ բնակվում է վարչապետն իր ընտանիքով:
ՀՅԴ ԳՄ ներկայացուցիչ Իշխան Սաղաթելյանը պահանջը ներկայացրեց ու հստակ ժամկետներ նշեց՝ Փաշինյանին ժամանակ տալով մինչեւ երեքշաբթի ժամը 12-ը կամավոր հեռանալու համար. «Եթե չհեռանա, մենք ամբողջ Հայաստանով մեկ դիմելու ենք անհնազանդության բողոքի ակցիաների: Եթե չհեռանա մինչեւ երեքշաբթի, կհեռացնենք եւ վե՛րջ»:
Սաղաթելյանը հիշեցրեց Փաշինյանի խոստումները, որ եթե ժողովուրդը պահանջեց՝ ինքը կհեռանա: Այսօրվա հանրահավաքը բավականին բազմամարդ էր:
«Հայրենիք» կուսակցության նախագահ Արթուր Վանեցյանն էլ ասաց, որ բոլոր օրինական միջոցների դիմելու են. «Նիկոլ Փաշինյանին այլեւս ՀՀ-ում ոչ միայն իրավապահ ուժերը, այլ առհասարակ պետական կառույցները չեն ենթարկվում: Ոստիկանները ապահովում են մեր բոլորիս անվտանգությունը, այլ ոչ թե Նիկոլ Փաշինյանի»:
Հռիփսիմե ՋԵԲԵՋՅԱՆ
