«Զրահաբաճկոնները եւ ռազմական նշանակության ապրանքներն առհասարակ ներկրվում եւ ձեւակերպումներ են ստանում համապատասխան ընթացակարգով։ Դա իրենից գաղտնիություն է ենթադրում, եւ ես այս հարցին հանրային մակարդակով չեմ կարող պատասխանել»,-խորհրդարանում լրագրողների հետ զրույցում այսօր անդրադառնալով երրորդ նախագահ Սերժ Սարգսյանի այն հայտարարությանը, որ բանակի թալանը տեղի է ունեցել այս իշխանության օրոք եւ որպես օրինակ՝ մեկ զրահաբաճկոնը գնվել է 600 դոլարով՝ ասաց ՀՀ Պետեկամուտների կոմիտեի նախագահ Էդվարդ Հովհաննիսյանը։
Նկատառմանն ի պատասխան, որ Սերժ Սարգսյանը զրահաբաճկոնների ներմուծման հարցում կոռուպցիոն ռիսկերի մասին էր ակնարկել, Էդվարդ Հովհաննիսյանը նշեց․ «Ներմուծման գործընթացում մենք կոռուպցիոն ռիսկեր չենք տեսել։ Քննություն կատարելու կամ որեւէ գործընթաց սկսելու հիմքեր չենք արձանագրել»։
Լրագրողները հետաքրքրվեցին՝ ի վերջո 600 դոլարանոց զրահաբաճկոն ներկրվե՞լ է։ «Ոչ»,-պատասխանեց ՊԵԿ նախագահը։ Հստակեցնող հարցին ի պատասխան, թե «առհասարակ չի ներկրվե՞լ, թե չեք կարող ասել», Հովհաննիսյանը նշեց․ «Այդ հարցը չեմ կարող հանրայնացնել։ Առհասարակ, ռազմական նշանակության ապրանքների մասին մանրամասները չեն կարող ներկայացվել»։
Կարդացեք նաև
Ինչ վերաբերում է փաստին, որ պատերազմի ժամանակ Ֆրանսիայի ուղարկած հումանիտար օգնությունը նպատակին չի հասել, քանի որ մաքսային ձեւակերպման խնդիրներ կան, Էդվարդ Հովհաննիսյանը պարզաբանեց․ «Խնդիրները մաքսային ձեւակերպումների հետ կապված չեն։ Առհասարակ, պատերազմի օրերին ՀՀ ուղարկված ապրանքների մաքսային ձեւակերպումների հետ խնդիրներ չեն եղել եւ դրանց հետ կապված չեն։ Ֆրանսիայի դեպքում ապրանքը ներմուծվել է հ/կ-ի անունից, եւ ըստ մեր օրենսդրության՝ մաքսազերծման նպատակով ապրանք ներկրողն է պարտավոր հայտարարագիր եւ կից փաստաթղթեր ներկայացնել, որպեսզի ձեւակերպումները սկսվեն։ Այդ փաստաթղթերը չեն ներկայացվել»։
Լուիզա ՍՈՒՔԻԱՍՅԱՆ
