Երեկ քաղաքաշինության, տեխնիկական եւ հրդեհային անվտանգության տեսչական մարմինը հայտարարություն էր տարածել, որ Covid-19 համավարակի տարածումը կանխարգելելու նպատակով տեսչական մարմինը ՀՀ առողջապահական եւ աշխատանքի տեսչական մարմնի եւ Ճանապարհային ոստիկանության հետ վերսկսել են համատեղ վերահսկողություն իրականացնել հանրային տրանսպորտի գործունեության նկատմամբ:
Տեղեկացվել էր, որ վերահսկողական աշխատանքներն իրականացվելու են Երեւանի տարբեր վարչական շրջաններում։
Նրանք հորդորել էին, որպեսզի հասարակական տրանսպորտից օգտվող ուղեւորները պարտադիր կրեն դիմակ, իսկ ուղեւորափոխադրում իրականացնող տնտեսվարողներն ու ֆիզիկական անձինք տրանսպորտային միջոցի ուղեսրահում պետք է ունենան ախտահանիչ հեղուկ, ինչպես նաեւ սպասարկումն իրականացնեն միայն տրանսպորտային միջոցի նստատեղերի քանակով՝ բացառելով գերբեռնված երթեւեկությունը։ Իսկ այն ուղեւորներն ու տնտեսվարողները, ովքեր չեն պահպանի վերը նշված անվտանգության կանոնները, օրենքով սահմանված կարգով կենթարկվեն վարչական պատասխանատվության։
Լուսանկարներում 74 երթուղայինն է: Ի՞նչ եք կարծում, այս հակահիգիենիկ շարժական գույքում հնարավո՞ր է մարդը դիմակով նստի: Հավանաբար, այդ պատճառով վարորդներն իրենք դիմակ չեն կրում:
Կարդացեք նաև
Անտանելի հոտ, կեղտոտ սրահ, սպառողի նկատմամբ անհարգալից վերաբերմունք է նման երթուղայիններով ճանապարհ ընկնելը:
Բավական է հորդորելը, դուրս եկեք ձեր ծառայողական մեքենաներից ու աշխատասենյակներից, եւ մի տասը րոպե շրջեք Երեւանով այս երթուղայիններով:
Հաստատ, ինքներդ դեն կնետեք դիմակները, իսկ սրահում չեք գտնի այն «անմահական» ախտահանիչ հեղուկը, փոխարենը կգտնեք լուսանկարում պատկերված աղբը:
Անահիտ ԳՐԻԳՈՐՅԱՆ
ուղեւոր
«Առավոտ» օրաթերթ
12.03.2021
