Մանկատները բեռնաթափելու կառավարության ծրագրերը վերջին մի քանի տարում տեղից չեն շարժվում: Մինչ այդ գոնե որոշ փորձնական ծրագրեր կատարվում էին, ինչի արդյունքում մանկատանը խնամվող երեխան վերադարձվում էր կա՛մ կենսաբանական ընտանիք կա՛մ՝ խնամատար: Այսօր, սակայն առանց ծնողական խնամքի մնացած երեխաները կրկին հայտնվում են մանկատներում: Ճիշտ է նրանցից մեծ մասի ծնողները, հարազատները երեխաներից չեն հրաժարվում, որպեսզի պետությունը չկարողանա երեխաներին որդեգրման տալ եւ նրանք այդպես էլ մանկատանն են մեծանում, բայց մանկատան խնամքին հանձնված երեխաներից ոմանք համարվում են որբ եւ ենթակա են որդեգրման, քանի որ նրանցից ծնողները կամ հարազատները հրաժարվել են:
Վիճակագրական կոմիտեն հրապարակել է, թե որդեգրման ենթակա քանի երեխա կա մեր երկրում: Ընդհանուր առմամբ, որդեգրման ենթակա է 37 երեխա, որից 16-ը աղջիկ: 37 երեխաներից 15-ը մնացել են առանց ծնողական խնամքի՝ չնայած, որ երկու ծնողներն էլ կան: Երկկողմանի ծնողազուրկ են 3 երեխա: Միայնակ մոր 9 երեխա կա որդեգրման ենթակա: 37 երեխաներից 9 երեխա էլ մնացել է առանց ծնողական խնամքի: Դատական կարգով անհայտ բացակայող ճանաչված ծնողի 1 երեխա կա, որը նույնպես ենթակա է որդեգրման:
Նրանցից 6-ը մինչեւ 6 ամսական են: Երեխաներից 9-ը՝ մինչեւ մեկ տարեկան են: Մեկ տարեկանից մինչեւ 6 տարեկան 11 երեխա կա որդեգրման ենթակա: Կոմիտեի հրապարակած տվյալներից նաեւ տեղեկանում ենք, որ 3 երեխա էլ 6 տարեկանից մինչեւ 10 տարեկան է:
Երեխաների խնամքի տներում 10-ից մինչեւ 15 տարեկան չորս երեխա կա որդեգրման ենթակա: 4 երեխա էլ 15-ից 18 տարեկան են: Որդեգրման ենթակա երեխաներն ամենաշատը Երեւան քաղաքում են: 37 երեխաներից 26-ին Երեւանում են լքել, որից 13-ը աղջիկ երեխաներ են: Գեղարքունիքի մարզից 3 երեխայից են հրաժարվել: Կոտայքից 6 երեխա կա որդեգրման ենթակա: Շիրակի եւ Սյունիքի մարզերից յուրաքանչյուրից 1 երեխա կարող է որդեգրվել:
Կարդացեք նաև
Որդեգրման ենթակա 37 երեխաներից 17-ն առողջ են, 20-ն ունեն առողջական խնդիրներ, որից հաշմանդամություն ունեցող են 3 երեխա:
Կոմիտեն հրապարակել է նաեւ որդեգրողի թվաքանակը: Համաձայն այդ տվյալների ներկայումս 137 քաղաքացի ցանկանում է երեխա որդեգրել: Նրանցից 94-ը Հայաստանից են, երկուսը՝ արտերկրում բնակվող ՀՀ քաղաքացիներ, երկու քաղաքացի էլ Հայաստանում բնակվող օտարերկրյա քաղաքացիներ են, 39-ն էլ արտերկրում բնակվող օտարերկրյա քաղաքացիներ:
Լուսինե ԲՈՒԴԱՂՅԱՆ
«Առավոտ» օրաթերթ
29.04.2021
Լուսինե ջան, ինչքան տխուր և սոցիալական դժվար լուծելի խնդիրներ կան, դրանց մասին ես գրում ; Առավոտը բացվել է։ Հետն էլ “Առավոտն” եմ բացել և միանգամից 2 տխուր նյութեր եմ կարդում՝ հոգեկան խնդիրներով տառապողների և մանկատան երեխաների մասին ։ Մի փոքր երկրում 2 մեծ խնդիր, որին արձագանքող էլ չկա։